Fann giftkjelde i Os hamn

Årsaka til at svanene blei blyforgifta kan vera funnen.

Stein Gjøsund synes det er skammeleg at nokon har kasta spesialavfall i elveosen i sentrum. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøylørdag 25. aug. 2012 21:39

I januar blei faren i knoppsvaneflokken i Oselvo, Hamnesjefen, fanga for undersøking. Svanefar fekk behandling for blyforgiftning, ein diagnose også ein av ungane fekk.

Brannvesenet har engasjert seg i det som var ei mogleg forureiningssak i Oselvo, og i mai var Rådgivende Biologer og to prøvar av botnen.

Men i juni konkluderte dei med at svanene truleg ikkje var forgifta i elva.

Fann to batteri

Fleire spekulerte i årsaka til at elva kunne vera forureina. Blant forslaga var mogleg dumping av batteri frå tida det var bilverkstad nær elva.

Fredag blei Midtsiden tipsa om funn av to bilbatteri på grunt vatn i Os hamn, rett på utsida av brua.

– Det er utruleg at ingen har funne desse før, meiner Egil Nordvik.

Nordvik gjekk nedom gjestebrygga ved Oselvarverkstaden fredag ettermiddag, og då oppdaga han to bilbatteri på innsida av den hesteskoforma brygga.

– På det eine batteriet er toppen knust rett av, men det er lufting på slike batteri, så også det andre batteriet er forureinande.

Ved "trappa" til svanene

Svanefamilien, som i år har fem (overlevande av sju) ungar, er ofte å sjå på graset utanfor Irisgården. Dei bruker ofte svaberget ved brygga til å koma seg på land, og har til og med brukt brygga til å hoppa frå (sjå video).

Batteria ligg så grunt at svanene fint når ned med nebbet.

– Dette er miljøkriminalitet

Då Midtsiden varsla brannvesenet om forureininga kom brannsjef Stein Gjøsund på inspeksjon.

– Dette er truleg dumpa frå ein båt, det er heilt utruleg at nokon kvittar seg med forureinande spesialavfall på denne måten, fortvilar Gjøsund.

Batteria ser ut til å ha lagt der ei stund. Måndag skal dei på land.

– Dette kan vera kjelda til blyforgiftinga hos svanene og er uansett forureining av lakseelva og hamna vår.

– Har det vore søk i elva etter forureining utover prøvene som er tatt? Burde batteria vore oppdaga før?

– Området svanene lever i er så stort at det ikkje har vore søk langs land. Eg trur også det er 2-3 år sidan det har vore ryddedugnad med dykkarar i hamna.

– Men sånn batteria ligg til er det utruleg at ingen har sett dei og varsla om dette før, synes brannsjefen.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.