- 03. apr. 2016

Fann selunge fortøydd i tau

Os brannvesen rykte før helga ut til Askvik for å ta hand om ein død sel.

Sånn låg selungen då Os brann- og redningsteneste kom til Askviknes torsdag. (Foto: Os brannvesen)
Kjetil Vasby Bruarøy
Kjetil Vasby Bruarøysøndag 03. apr. 2016 20:32

Torsdag var Os brann- og redningsteneste i Askvik etter melding om funn av død sel.

– Det var ein som bur i nabolaget på Askviknes som meldte frå. Han ville at vi skulle ta hand om kadaveret før det byrja å lukta, fortel varabrannsjef Arne Monsen.

På staden fann dei ein selunge som var festa med tau forankra i eit tre.

– Vi tok Unik-båten ut for å slepa den døde selungen på djupare vatn før vi sokk den.

Veit ikkje kor den kom frå

Monsen seier dei ikkje kjenner til korleis selungen hamna i Askvik.

– Men det var tydeleg at det var folk som har festa han i tauet.

Han veit heller ikkje om den var død før eller etter at den blei fortøydd.

Fiskarar seier til Fiskeribladet Fiskaren, i januar i år, at dei aldri før har observert så mykje sel på Sørlandskysten. No skal Havforskningsinstituttet og Universitetet i Agder GPS-merka selen.

Kan jakta på fire av sju artar

Det finst sju selartar i norske farvatn, kystselane havert (Halichoerus grypus) og steinkobbe (Phoca vitulina) held til langs kysten vår året rundt, medan artane ringsel (Phoca hispida), storkobbe (Erignatus barbatus), grønlandssel (Phoca groenlandica), klappmys (Cystophora cristata) og kvalross (Odobaenus rosmarus) kan opptre periodisk, særleg vinterstid i kystnære farvatn, ifølgje jakt-heftet Jakt på kystsel: Havets storvilt frå NJFF.

Totalt er det opna for jakt på fire av desse.

Hovudtyngda av havert i koloniar finst på kysten av Rogaland og frå Sør-Trøndelag og nordover til Finnmark.

Historisk sett har seljakt vore viktig for folk langs kysten. I sjøkarta finn svært mange kobbeskjer, kobbefluer eller ertnskjer, erkna og liknande. I Os har vi blant anna Kobbavågen. Dette tyder på at selane både har vore talrike og av betydning for busetnaden på kysten i store delar av historia vår.

Bli medlem du også!

Di støtte gir liv til lokalavisa vår.

  • Tilgang til alt innhald
  • For heile familien (6 pers)
  • Utan bindingstid
  • Berre 30 kr per veke
Teikna abonnement

Abonnementet blir fornya kvar 4. veke for kr 120 per månad. Du kan seia opp kor tid du vil, og blir då ikkje belasta for neste periode.