Midtsiden var med på ei av adressene då Trude og Johnny køyrde ut mat til 26 hus i Os. (Foto: Kjetil Vasby Bruarøy)

Får gratis mat på døra: – Livet mitt blei endra

Vi har vore med «Brøddamo i Os», som kvar torsdag fyller kjøleskapet i 20-40 hus i Os.

image
image
image
Av: Kjetil Vasby Bruarøy

Ho kallar seg «Brøddamo i Os», men brød er nesten det einaste Trude Beckholdt ikkje har i posane sine.

– Vi hadde avtale om bakervarer med ein butikk i Os, men no hentar vi alle varene frå Matsentralen. Dei har bakervarer av og til, men dei har i hovudsak mykje anna god mat.

– Å få ein tilleggsavtale på brød, med ein lokal butikk, står likevel på ønskjelista, seier Trude.

Ho har ein av minst tre organisasjonar i Os som hjelper andre på denne måten. Utan vederlag, og utan å få sponsa utgifter til bilhald, har ho i tre år køyrd ut mat til familiar i Os som lever på lågt budsjett.

– Eg blei vel fødd sånn, eg liker å hjelpa andre. Då eg fekk lov å vera med Evy Søfteland på utkøyring fekk eg dessutan oppleva gleda av å dela ut varer, å sjå kor glade folk blir, å sjå ungar som slepp å legga seg svoltne. I tillegg blei eg ufør i ung alder, så eg har tid til overs.

Mottakar: Inntekta gjekk ned, straumrekninga blei dobla

Midtsiden var med til ein av dei 26 husstandane som torsdag i førre veke fekk daglegvarer levert av «Brøddamo i Os».

– Eg bur i eit gamalt hus som krev vedlikehald, og økonomien var stram frå før. Eg har ikkje bil og eg har ikkje hatt råd til å reisa på ferie dei siste 12 åra. 

– I fjor blei eg pensjonist og fekk endå dårlegare inntekt, samtidig er straumrekninga mi dobla det siste året. Då er utgiftene til mat nesten den einaste utgifta eg klarer å redusera, fortel kvinna.

Eit nytt liv

Ho er ikkje småbarnsmor, men har ungar og barnebarn som ho liker å invitera på middag.

– Søndagsmiddag var ein fast samlingsplass for storfamilien, men i fjor blei det berre eit par gongar. 

Det var tilfeldig at ho i januar i år blei gjort merksam på kva Brøddamo har å by på.

– No føler eg meg utruleg heldig! Eg har jakta tilbudsvarer i butikkane på Os frå veke til veke, men det er fysisk tungt når du ikkje har bil og bur eit godt stykke frå nærmaste busstopp.

– Å få varer gratis, og mot 50 kroner få dei levert på døra, har betydd mykje for meg og familien. Fleire søndagsmiddagar har det òg blitt. Det er godt for ei bestemor å ha litt å by på. 

Bil nummer fire på tre år

Kvar torsdag reiser Brøddamo til Matsentralen i Bergen for å henta dagens varer til utkøyring. Så blir ho verande i rundt tre timar for å sortera varene i posar.

– Det er så spennande å sjå kva varer du får frå veke til veke at natt til torsdag stort sett er utan søvn for min del.

Dagane i forvegen har mottakarane på Facebook-gruppa skrive om dei vil ha varer den veka eller ikkje.

– Eg køyrer to torsdagar på rad i Os, den neste torsdagen i Husnes, og sånn held det på. I dag skal eg ut til 26 husstandar, som er ein vanleg dag. Då er eg ferdig i 21-tida om kvelden. Det meste eg har vore oppe i er 38 hus på éin dag. Blir det fleire må eg nok dela det opp med utkøyring to dagar i veka.

Sjølv om mottakarane betalar nokre tikroningar i drivstoffutgifter, dekker det ikkje dei totale utgiftene Trude har til innsatsen sin.

– Eg har slite ut tre bilar på tre år, dette er den fjerde. Eg veit ikkje heilt korleis eg skal gå fram, men eg har tenkt å sjå om eg kan få nokon til å sponsa dette. Det gjer meg ingenting å bruka av tida mi, eller av mine eigne pengar, som eg har gjort til no. Men det hadde vore enklare om eg hadde gått i null, om eg hadde hatt eit problemfritt og utgiftsfritt bilhald.

Fleire saker