Får støtte på Facebook

Med bloggen «Gull av Gråstein» er Ruth Birkeland Bjørø i finalen i Boligdrømmen 2010.

Førstepremien er 250.000 kroner. Då vi måndag skreiv om bustadbloggaren frå Os låg ho på 7. plass av dei resterande 20 finalistane.

- No ser det ut til å vera full mobilisering blant finalistane. I går var to andre på framsida av BA, og eg har ramla frå 7. plass til 8. plass, fortel Ruth.

- Heldigvis har eg fått god støtte i Os. Anette Hjelm Sørstrønen og Siw Merethe Sværholdt har engasjert seg og oppretta støttegruppe på Facebook, og her har det allereie kome 71 med.

Håpet er å halda seg på topp 10 til midnatt natt til måndag. Før siste finaleveke blir nemleg alle stemmene sletta, og vinnaren blir funnen ved ein kombinasjon av stemmer og jurydømming.

Slik ser topp 12-lista i skrivande stund ut:
1. Christine, Narvik: 11.256 stemmer
2. Robert, Oslo: 6.820
3. Erna Johanne, Alta: 5.029
4. Marianne, Fetsund: 4.775
5. Madeleine, Moss: 4.221
6. Line, Drammen: 4.160
7. Petra og Andreas, Bergen: 3.560
8. Ruth, Hagavik: 3.540 (Her kan du sjå bloggen og stemma)
9. Linda, Stavanger: 3.466
10. Marit, Grimstad: 3.377
11. Rune, Harstad: 3.263
12. Anette, Furnes: 3.211

Som du ser har Rune på 11. plass berre 277 færre stemmer enn Ruth frå Hagavik og Os. Det er berre dei 10 med flest stemmer som går vidare til siste finaleveke.

- Det er gratis å stemma og du kan stemma kvar dag om du vil, seier Ruth, som no håper på å samla ein brøkdel av kreftene som i fjor på denne tida sørgja for at oselvaren blei kåra til Noregs nasjonalbåt.