– Får vi leksefri no?

Det er ikkje berre dei vidaregåande skulane som hadde fokus på politikk og eige skuleval, elevane ved Nore Neset barneskule delte seg inn i parti og kjørte debatt og val.

SJÅ VIDEOREPORTASJE FRÅ DEBATTEN

Skulevalet blei halde valdagen måndag 14. september, med stemmerett til 5., 6. og 7. klasse. Resultatet blei motsett som hos dei vaksne.

– SV fekk over 30 prosent av stemmene og var største parti, seier rektor Børge Lunde.

Det var tydeleg kva punkt på SV sitt partiprogram som skåra best hos barneskuleelevane.

Manglande lokaldemokrati?

– Vi hadde ein av dei yngre elevane som jubla over resultatet og såg fram til leksefrie veker. Då andre forklarte at dette ikkje var eit ekte val, argumenterte han fint med at det trass alt var eit skuleval og i det minste burde gjelda for skulen vår, seier Lunde og ler.

Rektoren, som også står på lista til Høgre, har ingen planar om å redusera leksemengda med det første.

– Men vi er veldig glade for det arbeidet som blei gjort med elevane før valet, både dei vaksne og ungane har vore kjempeflinke.

Resultata

Her er resultata frå Nore Neset barneskule sitt skuleval

SV - 30,8%
H - 18.0%
FrP - 15,0%
Sp – 8,3%
KrF – 7,5%
Ap – 6,8%
V – 6,0%
TvS – 3,8%
MDG – 3,8%