– Fare for såre nakkar
Laurdag blir det metal og headbanging når eindagsfestivalen "Bjørnefjorden Bang Your Head, vol. 1" går av stabelen i bomberommet på Kuventræ med Sandnesbaserte Purified in Blood som headliner.
– Eg er imponert over at Andreas klarte å halde seg så lenge som seks månader.
– At han byrja å få abstinensar etter å arrangera noko kan eg stadfesta. Det at han fekk dei "problema" er ei gåvepakke til rockeklubben.
– Han kunne fort hamna på større scener enn hjå oss, seier leiar i Os Rockeklubb, Kjetil Osablod Grønvig, som sporenstreks tilsette Lindborg som arrangementssjef.
– Som ei europeisk rockescene
Fleire i musikkmiljøet har etterlyst ei rockescene i Os.
– Vi har lyst til å få Os til å kunne vera ein konsertstad også for rocken.
– Eg trur ikkje det skal vera noko problem å trekkje folk opp frå byen til Os.
– Vi klarte det på Rock n´LOL, og skal nok klare det igjen, seier ein entusiastisk Andreas Lindborg, som har satt opp programmet slik at byfolket skal rekkje siste nattbuss heim frå Os.
– Vikingar på tokt
På scena laurdag står dei lokale banda Inculter frå Fusa og Neoplasma frå Os saman med Purified in Blood.
– Purified in Blood har stått på store scener saman med mellomanna Slayer og har turnert utruleg mykje i inn og utland, blant anna i India.
– No skal to lokale band få stå saman med dei på den intime klubbscena i rockeklubben. Det blir heilt rått.
– I tillegg er det ganske kult at Inculter kjem med Hatvikferga og Purified med Halhjemsferga. Det er nesten som eit vikingtokt over Bjørnafjorden.
– Kunne ikkje passa betre med namnet Bjørnefjorden Bang Your Head då, ler Lindborg.
Lov med verge
Sjølv om det er 18 årsgrense og alkoholsal på festivalen opnar arrangørane opp for at også yngre kan få med seg konsertane.
– Vi har ei vergeordning kor ein edru vaksen over 25 år kan ha med seg inntil to under 18.
– Spesielt i forhold til Inculter, som er unge, så vil eg tru at det er kompisar som ikkje er gamle nok som kan ha lyst til å nytta dette tilbodet.
– Dessuten veit vi jo frå tidlegare at det er eindel yngre òg som diggar metal. Det er jo for dumt om ikkje dei skal få oppleve banda live.
– Vergen får eit merke på handa som viser at vedkommande har ansvaret for yngre og ikkje får lov til å kjøpa alkohol, forklarar arrangementssjefen.
Fekk støtte, torde satsa
Gjennom Norsk Rockforbund fekk Os Rockeklubb arrangørstøtte, noko som gjorde at dei torde satsa.
– Takka vera støtta torde vi å ta litt risiko.
– Eg såg på facebook at Purified in Blood spelt ein konsert i Stavanger, kor dei skulle nytta alle inntektene til å gå i studio.
– Også band treng pengar, så eg ringde dei og sa at vi ikkje kunne tilby dei sykt mykje, men at vi kunne garantera ein fet kveld.
– Svaret kom kontant, sjølvsagt ville dei komma tilbake til Os, så no blir det ein fet kveld i bomberommet på Kuventræ, avsluttar Andreas Lindborg.
Sist Purified in Blood var på Os avslutta dei fredagskvelden på Rock n´LOL i 2010.