Fare for stenging av parkering på Tøsdal

Osingane ser ut til å bli stadig ivrigare med å gå i fjellet.

På Tøsdal er parkeringsplassen, som på seinsommaren 2014 fekk utvida kapasitet frå 7 til 22 bilar, ikkje stor nok på dei finaste fridagane.

– Alle veit at dei ikkje skal gå på innmark. Då skal du heller ikkje parkera der, seier grunneigar Torbjørn Tøsdal.

Også tidlegare i år fortalte han om problem med både køyring og parkering på innmarka.

– Trass i at eg har sett opp gjerde langs begge sider av hovudvegen for å markera at folk ikkje skal parkera på dyrka mark ser det ikkje ut til at nokon bryr seg.

Fare for stenging

Tøsdal søkte sjølv om midlar til utviding av parkeringsplassen, men meiner det er på tide at folk finn andre plassar å stå om parkeringsplassen er full.

– Om dette held fram kan det enda med at parkeringsplassen blir stengt. Vi nærmar oss det punktet, om vi ikkje allereie er der.

Også Os brannvesen reagerer på den ulovlege parkeringa.

– Ved brannutrykning inne på Tøsdal ville vi hatt store problem med å koma fram slik det var i dag. Dei store bilane våre treng heile vegbanen der inne, skriv Os brann, beredskap og legevakt på eiga facebookside.