Feilparkert bil sperra for tilkomst til gasstank

Etter at det blei gratis for passasjerar å reisa med ferjer frå Halhjem, har det blitt kamp om parkeringsplassane på Halhjem ferjekai.

Politiet har vore fleire gongar på ferjekaien for å skriva ut gebyr, men er ikkje heilt kvitt problemet.

– Ein trailer som kom med påfyll til tankane til Gasnor, kom seg ikkje bort til LNG-anlegget grunna ein feilparkert bil, fortel vakthavande ved Bjørnafjorden lensmannskontor.

Trailersjåføren skal ha fått kontakt med eigar av bilen, som då sat på ei av ferjene. Vedkomande fekk seg kanskje ein tankevekkar, i tillegg var politiet ute og skreiv ut gebyr på 900 kroner.

Rykte ut til ulovleg bål i Lysefjorden

Tidlegare på dagen var politi og brannvesen i Lysefjorden, etter melding om mykje røyk frå eit bål.

Det viste seg at det låg ting i bålet som ikkje er lov å brenna, blant anna nokre møblar.

– Ein mann i 50-åra er meldt for ulovleg bålbrenning.

Politiet og brannvesenet har i år ekstra fokus på ulovleg bålbrenning, og Bjørafjorden kommune har laga eiga forskrift og eige informasjonsmateriell.

Tatt for køyring utan lappen

I 04.30-tida natt til søndag stoppa politiet ein bilist i Os sentrum.

Bilførar, ein mann i slutten av 20-åra, er meldt for køyring utan førarkort klasse B.

Politiet har òg vore ute på to privatfestar, begge med fleire enn fem deltakarar.