Hestetun delte ut medalje til gründarane, f.v.: Haaland, Sletnes, Lyssand og Drange (med ryggen til). Dagleg leiar Kolstad med mikrofon. (Foto: KVB)

Feira bursdagen på fjorden

Kos, kultur og komisk kunnskap: Det blei konsert på MS Midthordland og quiz på Solstråleøya då ABO feira 30-årsdagen sin.

image
image
image
image
image
image
image
image
image
image
image
image
image
image
Av: Kjetil Vasby Bruarøy

– Vi har i grunnen alltid vore flinke på dette med å feira, og å vera sosiale utanom arbeidstid, frå turar med fagleg innhald til fjellturar og sykkelturar, sa Bjørn-Atle Drange, ein av gründarane, i ein tale under feiringa av 30-årsdagen til ABO plan og arkitektur.

Sjå òg: ABO feira 25 år

Siste torsdagen i august, i 18 gradar på vindstille fjord, blei den runde dagen markert. Kundar og samarbeidspartnarar, frå advokatar, rådgjevarar og utbyggarar til politikarar og representantar frå ulike kommunar, var blant dei 90 på gjestelista.

Frå raud løpar og staseleg velkomst i kontoret i Hamnevegen gjekk turen vidare over brua og om bord i MS Midthordland.

Husband frå høgaste hylle

Ein annan av gründarane, Jan Haaland, hadde med seg det nye bandet sitt, Steppin' OUT, for å underhalda.

Bandet, som blei svært godt mottatt på debutkonserten i Oseana på forsommaren, består av Haaland på gitar og vokal, Kristine Bjånes på vokal, Knut Vidar Garlid på tangentar og Nils Midtseter på trommer.

Bandet hadde med seg Olav Skorpen på bass denne kvelden, og spelte både eigne og andre sine låtar mellom måltid og talar.

Nyttig og unyttig kunnskap

Skorpen var ikkje einaste «leigesoldat» om bord, ABO hadde med seg lokalhistorikar, professor og forfattar Nils Georg Brekke til å fortelja om stoppestadane på turen.

Første stopp var Solstråleøya på Tysnes, der gjestane gjekk i land for ein quiz i skogen. Nokre av spørsmåla var knytt til biologisk mangfald, andre til eit heilt anna mangfald; eigenskapane til dei 34 tilsette hos ABO.

«Kven har vunne armhevingskonkurranse i Haugesund?» og «kven har køyrd på 5 raude lys - etter kvarandre?» er ting du bør veta om du skal vera med ABO på tur.

Les òg: ABO har etablert seg på Stord

Cruiset gjekk vidare til varm velkomst på Engevik Gard i Sævareidfjorden, der det både var omvising og servering av kaffi, cognac og lefser.

Lanserte jubileumshefte

Dei fire ABO-gründarane Oddvar Lyssand, Rigmor Sletnes, Jan Haaland og Bjørn-Atle Drange hadde før festen skrive ned ABO-historia og fått laga eit hefte som dei delte ut på festen.

Gründarane, fleire av dei så vidt i ferd med å nyta pensjonisttilværet, har framleis eigne pultar i Hamnevegen, i «senile-kroken», som dei sjølv kallar det, i 2. etasje.

Om bord i Midthordland blei dei takka for grunnlaget dei la, og seinare vidareutvikla til ein stor arbeidsplass.

Tidlegare styreleiar, no fylkesordførar, Anne Gine Hestethun delte ut medalje og diplom for å heidra dei fire etter tale av dagleg leiar Arne Kristian Kolstad.

– Det blei ein strålande kveld på fjorden der vi var svært heldige med vêret. Seinare i september blir det jubileumstur for dei tilsette til Praha.

Fleire saker