9 av dei 10 i styret, f.v.: Tveit, Langeland, Mæland, Moberg, Axelsen, Hjertaas, Heggland, Kramer og Jørgensen. (Foto: KVB)

Feirar 20 år - lager 2 skulptursymposium i sommar

Fine tilbakeblikk i ny katalog - nye symposium i juni og juli.

image
image
image
image
Av: Kjetil Vasby Bruarøy

I år er det skulptursymposium i Os igjen - 20 år etter det første symposiet og det 11. i rekkja, om vi tar med sommarutstilling med skulpturvandring i 2015.

I 2019 er det symposium frå 24. juni til 6. juli, i marmor, granitt og tre, og nytt symposium av granitt frå Jæren i overgangen mellom juli og august.

Arrangør Os Kulturutvikling har fått laga ein katalog til 20-årsfesten, 28 sider som på ein ryddig og delikat måte fortel om årets to arrangement - og dei ti som har vore.

Brosjyren er forma og fotografert av Vidar Langeland - her kan du bla i katalogen (pdf).

Har prega heimbygda 

Det heile starta med at Arne Mæland reiste til Carrara i Italia for å læra å jobba med stein. Læremeister Boutros Romhein hadde òg erfaring og nettverk innan symposium, og er i dag den einaste kunstnaren som har deltatt på alle symposia i Os.

Mæland kom heim og fekk folk med seg. Os Kulturutvikling blei stifta, ein organisasjon som blant anna òg har tatt vare på, og innreia, Vognhallen.

Symposia i 1999, 2001, 2003 og 2005 gjekk i telt på Haugsneset, før Vindu mot Fjorden blei bygd. Så har den halde fram i Vognhallen.

6 av årets 12 er nye 

I alt har om lag 60 kunstnarar laga rundt 85 skulpturar i løpet av dei 10 symposia.

Desse kunstnarane kjem til Os til første av to symposium:
Anne Karin Krogevoll (Noreg)
Rune Hjermann (Noreg)
Boutros Romhein (Syria)
Elena Saracino (Italia)
Petre Mogosanu (Romania)
Marton Varo (Ungarn)
Naguib Moein (Egypt)
Gissella Garcia (Uruguay)
Flavia Robalo (Argentina)
Marcela Romagnoli (Chile)
Isao Sugiyama (Japan)
Jacob Cartwright (Australia)

6 av 12 har ikkje deltatt på symposiumet før; Anne Karin, Rune, Elena, Gisela, Flavia og Jacob.

Ei lang rekkje kjøparar

Os Kulturutvikling tar ansvar for reise, opphald og honorar til kunstnarane. Og for innkjøp av stein.

– Det første året kjøpte og henta vi 30 tonn med marmor, seinare har vi lagt på 10-20 tonn.

Alt er finansiert av at nokon kjøper skulpturane, før dei er laga, utan å veta kva dei får eller kven sin dei kjøper. Før trekninga på tampen av den rundt to veker lange verkstaden.

– Det kravde litt å få selt alle skulpturane dei første åra, vi gambla faktisk litt på at vi fekk selt i løpet av symposiet, og det gjekk bra.

– Det er ingen kjøparar som har kjøpt skulptur på kvart symposium, med unntak av Os kommune, men det har gått lettare og lettare å få finansieringa på plass.

Ein eigen runde med rullestein frå Jæren

Frå 29. juli til 4. august er nok eit symposium, men desse skulpturane kjem ikkje for sal.

– GC Rieber Fondene har kjøpt alle, og skal gi dei vekk til ulike organisasjonar, fortel Mæland.

Her er det ikkje marmor, tre eller kva som helst granitt, men rullestein frå Jæren som skal brukast.

– Det er ikkje stein frå fjøra, men frå gardane, stein som er blitt disponibel i samband med rydding av jord, og som er noko grovare enn den du finn ved sjøen.

11 ulike kunstnarar, 3 norske og 8 utanlandske, skal jobba med rullestein frå Jæren.

Fleire saker