Fekk 120 dagar fengsel

Ein osing i 20-åra er dømt til 120 dagar fengsel for grove trugslar. I perioden 27. november til natt til 14. januar 2010 skal han fleire gongar ha kome med grove trugslar mot mora si.

Les òg:
Truga familien

Skapte frykt
Mannen blei sikta for både brot på straffeloven paragraf 227 første alternativ, for å ha truga med handling som kan gje høgare straff enn seks månadar, og framkalla alvorleg frykt, og for paragraf 390, for med plagsam oppførsel å ha krenka andre sin fred.

Han blei også sikta for paragraf 162, etter at det under ransaking 19. januar i år blei funne 4 gram marihuana i bustaden hans.

Sikta erkjente alle forhold og innrømte straffeskuld.

SMS, telefon og Facebook
Sikta kom med trugslar per tekstmelding og telefon. Natt til 14. januar fekk hadde mora 27 ubesvarte anrop frå sonen, som også la ut trugslar på Facebook-profilen sin.

Mannen valte å forklara seg i retten, og sa at han aldri meinte å utføra noko av det han truga med. Bakgrunnen skal vera eit konfliktfylt forhold til familien, noko som fekk han til å ta kontakt på feil måte.

Sikta blei i Nordhordland tingrett 22. februar dømt i tilståelsesdom til 120 dagar fengsel. Det blir frådrag for 39 dagar som han har sete i varetekt.