Fekk åtvaring grunna spor etter sladding

I 03-tida natt til søndag kontrollerte politiet ein bilførar som sto parkert på Kuventræ.

– Det var merke etter sladding på staden, men patruljen hadde ikkje sjølv observert sladdinga, opplyser vakthavande ved Bjørnafjorden politistasjon.

Vedkomande fekk ei åtvaring.

Natt til laurdag blei ein annan bilist observert mens han sladda. Vedkomande fekk førarkortet beslaglagt.

Det la seg eit dekke med snø etter natt til torsdag, og det snødde lett også natt til søndag.

I 23-tida laurdag kveld fekk politiet melding om mogleg gasslekkasje i ein bustad i eller nær Banktjørn (korrigert, vi fekk først opplyst at det var Søfteland).

Politi og brannvesen rykte ut, og dei som bur i huset blei evakuerte. Brannvesenet gjennomførte fleire målingar på staden, men fann ingen lekkasje og vurderte bustaden som trygg.

Laurdag morgon i 08.20-tida hadde politiet promillekontroll på Byvegen på Røykenes.

33 trafikantar blei kontrollert for promille utan at politiet fann noko å reagera på.