Fekk fyr i Fonos

Bildeserie:

1 av 3

Frå 1996 til 2005 skapte Elisabeth Moberg, saman med venninnene Kjersti Berge og Marit Voldsæter, tidenes revysuksess i Bergen.

Kvinner på randen-trioen passerte i 2002 heile 200.000 selte billettar og var også populære TV-jenter med program som Kvinner på randen av en oppskrytt TV-aften og Taxi, Taxi.

– Vi var på jakt etter litt ekstern instruksjon og eg hugsar Elisabeth deltok i eit prosjekt far min var med på i 1994. I tillegg var eg stor fan av Kvinner på randen, seier Fonos-dirigent Stine Kobbeltvedt om årsaka til at Fonos hyra inn Moberg.

Søndag fekk Fonos over fem timar saman med Elisabeth Moberg på øving på Kuventræ skule.

– Men den viktigaste årsaka er at ho er utruleg fagleg dyktig innan musikk, og at ho har veldig allsidig bakgrunn frå både musikk og teater.

Kvikk og kul

Moberg har sjølv blitt undervist i songteknikk frå ho var 11 år, studert musikk i Oslo og også i nyare tid sett seg inn i moderne forsking på stemmebruk.

– For ein del år sidan jobba eg mykje med ulike ensemble og eg er veldig glad i, og opptatt av, god korklang, fortel ho.

– Og så kjem eg til Os og møter eit så fantastisk kor.

– Dei har veldig mange fine stemmer, god samklang, dei er gode til å lytta til kvarandre og dei har ein veldig fin tekstforståing. Og så har dei ein veldig kvikk og kul dirigent synest Elisabeth.

– Ekstremt inspirerande

Stine fortel om ein veldig vellukka øvingsdag med koret.

– For det første er Elisabeth veldig kunnskapsrik, og ho var veldig engasjert og gav utruleg mykje av seg sjølv.

– Og så kan ho så mykje meir enn akkurat det tekniske, både og framføring og formidling.

– For meg som dirigent var det deilig å sleppa å vera den som skulle snakka til koret ein heil dag, og for alle oss i Fonos var dette ein fantastisk lagbygging-dag. Vi har utvikla oss frå år til år, men er langt frå utlærd, og prøver stadig å bli betre. Dette gav oss ein saftig dose inspirasjon, seier Stine Kobbeltvedt.

Nesten 400 såg Fonos sin sommarkonsert i 2013. Sjå video og bildeserie.

Fredag 13. juni held Fonos sin sommarkonsert i Oseana - i år med blåserekke.

VIDEO: Sjå ein kort snutt frå øvinga søndag. (Foto: KVB)