Hans Bjørn Bakketeig med Johny «Cash» Olsen Band på scenen. (Foto: Kjetil Vasby Bruarøy)

Fekk inn 100.000 meir enn venta

– For meg som er så lettrørt så blei det nesten ei påkjenning, seier Hans Bjørn etter den vellykka Moldova-festen på torget.

image
image
image
image
image
Av: Kjetil Vasby Bruarøy

Hans Bjørn Bakketeig har gode venar og mange støttespelarar i heimbygda.

Venane arrangerte auksjon, musikk og sal av mat til inntekt for Hjelp Moldova, og mange stilte opp for å delta og for å støtta organisasjonen som den lokale optikaren har vore sentral for i nesten 20 år.

• Les òg: Fullt torg for Hans Bjørn (med bildeserie)

– Vi hadde på førehand tenkt at kanskje klarer vi å få inn 20.000-30.000 kroner. No ser det ut som om totalsummen blir 130.000 kroner, seier kokk og kamerat Gunnar Nagell Dahl.

Auksjon av varer frå ulike butikkar og personar i Os gav over 30.000 kroner i inntekt og Os kommune kom med gåvesjekk på éi krone per innbyggar, altså over 20.000 kroner. Venane selte mat som Gunnar hadde laga, kundane betalte valfri pris frå 50 kroner.

– Mange betalte 100 kroner, enkelte 500 kroner, for ein porsjon med laks og byggryn.

Restauranten Havnechefen gav prosent av omsetnaden sin, noko som resulterte i ei gåve på 5200 kroner.

– Mest imponerande er nok Johny Olsen, som vi frå no av berre kan kalla Johny Cash! seier Nagell Dahl.

Trudde du at folk ikkje går med kontantar i lommene lenger?

Bandet sette fram to bøtter, ei grøn for dei som likte musikken, ei raud for dei som ikkje likte den.

– Det kom inn 22.000 kroner i cash i den grøne bøtta!

– Kom det ingenting i den raude?

– Jau. 50 kroner. Av ein dårleg kamerat av oss. Vi tok han for oss på kvelden, seier Gunnar og ler.

Fekk 10.000 kroner av gjest på Osfest

Hans Bjørn Bakketeig er overvelda over innsamla beløp - og av kor fin den vesle torgfesten blei.

– Ein del av midlane vi får er øyremerkte. Når vi får inn frie midlar som dette gir det rom for å både å hjelpa enkeltmenneske, som gjerne treng spesialbrille, eller til å kjøpa inn spesialutstyr, som mange har nytte av. Desse pengane vil endra livet til mange menneske!

– Eg er ikkje berre glad for summen, men for den stemninga som var på torget. Det å sjå at folk har det kjekt var hovudårsaka til at eg i si tid var med i styret i Osøren Blues og Jazzfestival. Det var fantastisk å oppleva litt av det same på Osøyro laurdag.

– For meg som nærmast er landskjent for å vera lettrørt blei det samtidig nesten ei påkjenning. Eg var heilt matt etterpå, men tok meg ein tur på Osfest.

På Osfest var det meir støtte å henta.

– Ein lokal firmaeigar kom bort til oss og sa at han òg vil støtta aksjonen, og kom med 10.000 kroner i støtte, fortel Bakketeig.

Venegjengen som sto for arrangementet ønskjer å gjenta suksessen, og torgfest for Moldova kan bli ein årleg aksjon på Osøyro.

 

Fleire saker