– Den kom brått på, fortel Jarle, som var rask med å henta mobiltelefonen for å dokumentera fangsten før han blei sleppt laus. (Foto: Jarle Lund)
– Den kom brått på, fortel Jarle, som var rask med å henta mobiltelefonen for å dokumentera fangsten før han blei sleppt laus. (Foto: Jarle Lund)

Fekk to meter lang hai i garnet

– Truleg den mest spesielle fangsten eg har fått, seier yrkesfiskar Jarle Lund.

Kjetil Vasby Bruarøy
12. august 2020 - 22:37

Onsdag la kona til Jarle Lund ut ein video av mannen sin fangst i Bjørnafjorden - ein stor hai av arten håbrann (Lamna nasus) sprella ivrig i garnet då den kom opp til overflata.

– Den sto i enden av eit seigarn, og garnet kom under båten då eg halte. Brått kom haien til overflata, fortel Jarle, som var rask inn i styrhuset for å henta mobiltelefonen for å filma.

(Artikkelen held fram under videoen)

– Garnet sto utanfor Vernøyane (mellom Våge og Øyane), på rundt hundre meters djupne. Eg veit ikkje om haien gjekk i garnet mens det sto på botnen, eller om den gjekk etter fisken mens eg halte garnet opp.

Jarle, som er i 50-åra, har vore fiskar heile livet. Han har fått håbrann før, men då har den vore rundt 40-50 kilo tung.

– Denne var nok 150 til 200 kilo, og over to meter lang. Den hadde ein imponerande tanngard, synest fiskaren frå Søre Øyane.

Ifølgje Wikipedia kan håbrann bli tre meter lang og opptil 200 kilo.

Håbrannen blei sleppt fri. (Foto: Jarle Lund)
Håbrannen blei sleppt fri. (Foto: Jarle Lund)

Håbrann er raudlista som «sårbar», men blir den tatt som bifangst kan du få levera den på mottak. Kjøttet blir sett på som ein delikatesse, og skal minna om kalvekjøtt.

– Sidan denne levde, og såg ut til å villa klara seg, fekk eg lirka den ut av garnet utan å ta den om bord. Heller ikkje på mottaket eg leverte resten av fisken, hadde dei fått inn så stor håbrann.

Det betyr at den store håbrannen framleis svømmer rundt i Bjørnafjorden.

Synest du det høyres skremmande ut, kan du trøysta deg med at to andre haiartar som kan dukka opp i fjorden vår er endå større; håkjerring kan bli 7 meter lang, brugde er største hai etter kvalhai, og kan bli over 13 meter lang.

I 2010 skreiv NRK om Noregs største håkjerring, ein fisk på 880 kilo, som blei tatt i Boknafjorden.

Til samanlikning er kvithai normalt 3-4 meter lang. Håbrann og håkjerring lever på djupt vatn, og skal ikkje vera farlege for menneske. Men håbrann kan angripa dykkarar med fisk på harpunen.

Ifølgje Havforskningsinstituttet er håbrann den største av dei raskt-svømmande rovhaiane i Noreg, og i same familie som kvithaien.

Lund hadde ein spennande dag om bord i MS Fjordglans måndag. (Foto: Jarle Lund)
Lund hadde ein spennande dag om bord i MS Fjordglans måndag. (Foto: Jarle Lund)