Fekk parkeringsbot i Øyane

Han trudde nærmast det var ein spøk, mannen som i går fann ein gul lapp på bilen han hadde parkert på Bruarøy.

– På denne plassen har det i alle år stått bilar i korte periodar, anten det har vore gjestar eller andre som har hatt bruk for ein plass å stå nokre timar, fortel innringaren til Midtsiden.

– Eg kan heller ikkje forstå at det ikkje skal vera lov å stå her. Ikkje er det skilta og ikkje står bilane i vegen for nokon. Det er ein busshaldeplass ved sidan av, men den blir ikkje brukt på same måte som før, då den var snuplass. Bussen stoppar alltid midt ute på plassen her og er ikkje hindra av dei parkerte bilane.

8 gebyr i 4 nabolag

Teknisk sjef Marianne Kramer fortel at det i går blei skrive gebyr fleire stadar i Os.

– Vakten var i Oshaugen, på Søfteland, i Varåsen og på Bruarøy.

– Det blei skrive i alt åtte gebyr, to av dei på Bruarøy i Øyane.

Ingen alternativ?

Kramer seier bakgrunnen for inspeksjonsrunden var at både innbyggarar og Skyss har tatt kontakt og varsla om problemområde.

– Skilt må respekterast om vi skal sikra framkomst og tryggleik.

Der det ikkje er skilta gjeld likevel generelle trafikkreglar, som blant anna fortel kva avstand du for eksempel skal ha til kryss, fotgjengarfelt og busstopp.

– For det første synest eg dei kunne kome med ei åtvaring om dei har eit område dei meiner det er problem med ulovleg parkering, for det andre lurer eg på kvar dei meiner gjestar i Øyane skal parkera, seier mannen som fekk gebyr.

– Det er sjeldan det går bussar ut her, kvar er det planen at folk skal parkera? undrast han.