– Fell for det fine avbrekket
Styreleiar Eli-Karin Wiberg fortel om over 500 medlemmar - og om korleis ho sjølv blei lokka inn i golfverda.
Bildeserie:
– Det starta med at mannen min, Bjarte, tok døtrene våre med. Ho yngste er framleis aktiv, sjølv blei eg aldri nokon dyktig konkurranseutøvar. Eg fell for det fine avbrekket, ei stund med frisk luft og mosjon, samtidig som du har noko å konsentrera deg om, anten du er åleine eller saman med andre.
Ho får framleis spørsmål om ikkje golf tar lang tid å spela.
– Du kan spela så lenge du vil, men du går fint gjennom ein 9-holsbane på to timar. I løpet av desse to timane med spel, tur og gjerne ein samtale, om du har nokon med deg, får du eit avbrekk frå alt anna. Eg forstår godt at mange i næringslivet har brukt golf aktivt i fleire tiår.
Over 500 medlemmar
Bjørnefjorden Golfklubb fekk ein brakstart, mykje takka vera at Fana Golfklubb skulle bygga bane. Mange frå Fana kom til Os for å førebu seg, og medlemstalet fauk opp i over 1.100. 300 forsvann raskt etter at Fana opna, men klubben på Hauge har framleis over 500 medlemmar.
– Vi ønskjer fleire medlemmar, det er heilt klart. Medlemskontingent er saman med sponsorar viktigaste inntektskjelde. Elles leiger vi òg ut klubbhuset, og dei to simulatorane vi fekk installert i 2005, seier Eli-Karin.
Blant medlemmane er det rundt 20 juniorar som er aktive konkurranseutøvarar.
Les òg: I år er det 25 år sidan Bjørnefjorden Golfklubb blei stifta.
Ser etter ny driftsleiar
Per-Ove Bahus Lysvold var greenkeeper frå 2010 og overtok som driftsleiar etter at Eivind Hodneland i 2015 sa seg opp som dagleg leiar. I fjor fekk han avlasting då klubben tilsette greenkeeper Mark Allan Mascolo, som hadde 14 år bak seg som greenkeeper i Losby Golfklubb utanfor Lørenskog. I sommar gir Lysvold seg for å byrja i ny jobb i Bergen.
– Per-Ove har gjort ein fantastisk jobb i mange år, og har hatt hovudansvaret for at banen vår har skilt seg ut som ein av dei betre i området. Det blir eit tap for klubben, seier Wiberg, som saman med resten av styret jobbar med å finna ein arvtakar.
–Eg vil takka for godt samarbeid og gode relasjonar i dei ni åra eg har jobba for Bjørnefjorden Golfklubb. Det har vore ni spanende, utfordrande og givande år med mange hyggelige kjenningar og relasjoner som kan komme til nytte i framtiden, seier Lysvold sjølv.
Golfskule og nyutdanna pro
Etter to år med pause har klubben golfskule for born og ungdom igjen. Denne går av stabelen tre dagar veka inn mot jubileet.
– Hovudinstruktør er pro-en vår, Anders Engelsen, som no er tilbake i klubben for fullt etter å ha fullført si PGA Bachelor-utdanning over 3 år ved Høgskulen Innlandet i Elverum. Han får med seg fleire av juniorane våre som instruktør saman med andre frivillige.