Fem år med lipgloss og kjeledress

Bildeserie:

1 av 3

I helga markerte dei songglade damene det dei sjølv karakteriserer som «fem strålande år».

Markeringa starta med kreativ dag på Nore Neset ungdomsskule. Her var det tid for øving, kreativ verkstad - med vassekte aktmodell, og det heile vart toppa med synkron-symjing og opphald på Solstrand Hotel & Bad.

Konto hos Felleskjøpet

Sjølv om medlemmene har trukke i dei karakteristiske Felleskjøpet-antrekka sine, er det lite fjøslukt å spora når vi treff dei til lunsj på laurdag.

– Kva er greia med Felleskjøpet - er de sponsa?

Karianne Maltun kan fortelja at det byrja med namnet, og så kom heile temaet automatisk etter det.

– Det fall liksom berre på plass når vi først hadde namnet. Vi er ikkje sponsa, men vi har konto hos Felleskjøpet.

Her blir lokalhistorikar Mari Lyssand oppmoda om å greia ut om den inngåande forskinga ho har gjort kring koret si kopling til det lokale landbruket;

– Mellom oss stammar vi frå veldig mange gardar i Os. Ser vi på tala frå ei stor oppteljing i 1865, var det mykje storfe i Os. Men akkurat denne gjengen; dei kjem frå ei rekkje gode sauebønder.

100 år med erfaring

Med alibiet godt plassert i ein lokal sauefjøs, held praten fram i eit kolossalt tempo.

Det er tydeleg at dette er ein strukturet gjeng. Med fellesnemnar at dei alle er vakse opp på Os, har dei òg rekna ut at dei mellom seg har meir enn 100 år med kor-erfaring.

– Vi er mykje som desserten Tilslørte Bondepiker, sprø på utsida, men under finn du fleire spanande lag, fortel Maltun.

– Men vi må gje Kristine Bjånes eit godt lag med ære for den jobben ho har gjort som dirigent. Ho er nøkkelen vår, og med henne vert vi stadig dregen lengre og lengre ut av komfortsona vår.

Lett rødmande fortel dirigent Bjånes at det å vera nøkkel ikkje er den mest vanskelege jobben;

– Eg har jo med ein «ja-gjeng» å gjera, ingen idear vert skotne ned, og kvart medlem er ein ressurs i seg sjølv. Slikt vert det kreativ gøy av.

50 oppdrag på 5 år

At det er ein marknad for Felleskjøpet i kombinasjon med korsong, er Tilslørte Bondepiker eit levande prov på.

Oppdrag for Bondelaget, Hordaland Sau og Geit, internasjonal veterinærkonferanse med deltakarar frå 60 (!) land - og heilt i andre enden av komfortsonen; på scenen saman med metallbandet Enslaved på USF Verftet.

– Vi skreddarsyr alle oppdraga vi får, fortel Bjånes, og vi kjem nok aldri til å blåkopiera oss sjølv.

På spørsmål om det ligg eit overordna mål bak det heile, kanskje ei plateinnspeling eller verdsturné, kjem det eit overraskande svar;

– Vi vil til New York!

– Eller vent litt, kanskje vi heller skulle ha drege til Irland. Det er jo den grøne øya ...

Herifrå går diskusjonen heftig om jentene skal gå for bling i New York, eller om dei skal søkja det enkle bondelivet i Irland.

Om Tilslørte Bondepiker kjem seg til New York og Irland vil berre tida visa.

2. november kan du uansett sjå og høyra dei i Oseana saman med Old Timers Big Band.