Fengjande frå kulturskulen

Bildeserie:

Full skjerm

1 av 2

Til vanleg øver elevane på kulturskulen meir tradisjonelt med eit klassisk reportoar. No har både elevane og lærarane tatt steget ut av komfortsona når dei inviterer til latinamerikansk konsert torsdag om ei veke.

– Det blir ein konsert med levande musikk, levande sang og levande dans. Vi har aldri gjort noko tilsvarande før, fortel tre av lærarane, Morten Norheim, Torstein Åvar Sollien og Patricia Langeland.

Elevar og lærarar saman

Konserten som har fått namnet «Fiesta Latina» er ikkje berre unikt med tanke på musikken, men også i formen.

– Det spesielle denne gangen er at vi som lærarar er likestilt med elevane i ensemblet og sit skulder ved skulder med dei og spelar. Til vanleg er det jo slik at vi instruerar og elevane spelar. Denne gangen får vi brynt oss sjølv også, smiler Norheim som er lærar i treblås.

Ei latinamerikansk kulturoppleving

Det heile starta med at Torstein Åvar Sollien og Patricia Langeland byrja å snakka om latinamerikanske rytmer tidleg i fjor haust, og fann ut at dei hadde lyst til å foreslå eit fellesprosjekt for heile skulen.

– Alle var med. Vi har vel knapt hatt kjekkare lærarmøter enn etter at vi starta dette prosjektet. Den store utfordringa har vore å kutta det heile ned. Vi starta med at alle foreslo tre låtar dei likte, så var det å finna dei vi skulle ha med i den timeslange konserten og å arrangera dei for alle instrumentgruppene.

– For meg som er fødd i Chile og oppvaksen med latinamerikanske rytmene har det vore litt av ei kulturoppleving å vera med på. Det er ikkje alltid eg med min latinamerikanske bakgrunn har tykt at den musikken desse menna har foreslått har vore like bra, men vi har kome fram til einigheit, smiler Langeland.

– Ikkje berre for foreldra

Midtsiden var med torsdag ettermiddag då alle dei 140 musikarane, songarane og danserane var samla til første øving.

– Fram til no har vi øvd kvar for oss. Dette er første gang vi øvar saman. Vi har litt å gå på førebels, men med øvinga i dag og på søndag så kjem det til å sitta. Det er så utruleg gøy å sjå entusiasmen frå alle.

– Vi håper virkeleg at fleire enn foreldre og besteforeldre har lyst til å komma på konserten. Osingane treng å sjå og høyre kva ungdommen får til. Det blir garantert fengjande, avsluttar dei tre.