Bildeserie:
Tom Fossengen har lang erfaring i hotellbransjen i inn- og utland, blant anna som hotellsjef i Bergen. No er han pensjonist, men ligg ikkje på latsida.
– Eg kom over denne emballasjen, som er utvikla i Sverige og patenbeskytta over heile verda, fortel Fossengen, som flytta til Os for 5-6 år sidan.
Emballasjen skal ifølgje Fossengen bli brukt på ei rekke kantiner og sjukehus, blant anna i Sverige og England.
– Ferdiglaga middag er praktisk, eg forstår at mange som bur åleine eller som berre er to ikkje tar seg bryet med å koka poteter, saus og grønsaker. Men med denne pakningen får du ved eit enkelt grep middagen rett på tallerken.
Fjernar botnen i eitt drag
Emballasjen rommar middag for éin person, og ser ved første augekast ut som ei eske Fjordland eller liknande.
Men på sida er ein laus plastflik, og drar du lett i denne så forsvinn heile botnen.
– Du får ei ekstra god kjensle når middagen ligg fint på tallerken. Mange et ferdigmiddag rett frå eska, andre har gjerne problem med å opna glovarme posar som ferdigmiddag ofte er pakka inn i.
– Her varmar du maten i steikeomn eller mikrobølgeomn og vips så er den fint dandert på fatet.
Lokalmat frå Safari-kjøkkenet
Fossengen ville meir enn å selja esker, og sto med agenturet sitt fritt til å velja leverandør å fylla emballasjen med mat.
– Eg kom i kontakt med Matlyst, matprodusenten til Safari før Safari-kjeda blei selt. Dei har saman med søsterselskapet Safari Catering lang og god erfaring med heimelaga mat.
Stig Larsen frå Matlyst deltok då Fossengen sin emballasje blei presentert hos Rema 1000 førre veke. Matlyst har eksklusiv avtale med distribusjon hos Rema på Vestlandet i starten.
– Vi produserer alt sjølv, frå botnen av, og har ikkje tilsetjingsstoff. Middagane våre har ikkje same utlaupsdato som konkurrentane, men her veit du at du får potetstappe laga av poteter og kjøtt og pølser produsert av lokalt av kortreiste råvarer, seier Larsen.
Rema har også vore med på å forma utvalet. I tillegg til middagane i spesialemballasjen frå Fossengen, sel Matlyst eigne middag for fire-pakkar, og lunsj som kan etast både kald og varm.
– No er vi spent på mottakinga av dette utvalet, som etterkvart blir utvida med endå fleire rettar, seier Stig Larsen.