– Ferskare får du den ikkje
Endeleg kan du få kjøpt fersk torsk direkte i Os hamn. Det var kø då Tomas Ådland klappa til kai.
Bildeserie:
I vinter har Vest-norges Fiskesalslag opna for direktesal av fisk frå båt i Hordaland. Sjarkfiskar Tomas Ådland frå Holmefjord blei historisk og populær då han som den første klappa til kai i Os hamn med fersk torsk. Eit tjuetals kunder sto og venta på fiskaren då han kom.
– Dette er berre heilt fantastisk. Ferskare fisk enn dette får du ikkje. Dette har vi venta på, kommenterte kundane som sto i kø medan Ådland fiska opp torsken frå brønnen i botn av båten.
– Folk må jo få fersk fisk
Ådland fortel at fisken har han fanga rett ute i havgapet. Fangsten låg stort sett på tre til fem kilo, men ein òg anna rugg opp mot ti kilo hadde òg hamna i brønnen.
– Eg har no mine faste plassar kor eg pleier å gå. I dag har eg med meg ein fangst på omlag 300 kilo.
– Kva betyr det å no kunne få selja direkte til forbrukarane?
– Det skulle ha vore lov for lenge sia. Folk må jo få fersk fisk. Endeleg er det lov også her i Hordaland.
Ein gong i veka
Det populære tiltaket ser ut til å vera komme for å bli.
– Eg kjem att torsdag i neste veke. Det blir ikkje så tidleg som i dag, men i tolvtida trur eg eg kjem til til å vera her.
– Tek du sikte på å gjera dette fast framover?
– Ja, så sant eg får fangst, så kjem eg ein gong i veka i allefall i ein månads-tid framover. Fisket skal jo ta seg opp no, så eg reknar med eg får noko å selgja, smiler fiskaren, som framleis hadde att ein fem-seks torsk i brønnen då Midtsiden forlot han i elleve-tida.