Filma for BBC på Svalbard

BBC sin nye dokumentarserie «Human Universe» blei filma med luftig assistanse frå Os.

Anders Fløysand og Øystein Skorpen på stranda på Svalbard, kor ei av scenen blei spilt inn (foto: John Kaare Hoversholm)
Andris Hamretorsdag 03. juli 2014 10:39

Professor Brian Cox er av mange omtala som Sir David Attenborough sin etterfølgjar i BBC si verd av dokumentarar.

Då han skulle filma nokre av scenane i den nye serien «Human Universe» på Svalbard, fekk Varde Aerial oppdraget med å filma bileta frå lufta.

Les òg: Med lisens til å fly

– Det å vera med på ein BBC-produksjon er vel det største ein kan oppleva i TV-bransjen.

– Vi har tidligare bidratt til både TV2 og NRK, men eg må innrømma at det jobba med folk frå BBC-systemet var noko for seg sjølv, fortel fotograf og Varde-eigar Anders Fløysand.

– Kan de stilla på sundag?

Spørsmålet om å bidra på Svalbard kom frå John Kaare Hoversholm.

– Vi har jobba med John Kaare tidlegare. Han var hyra inn frå produksjonen for å fiksa det dei trengte av utstyr og bistand i Noreg.

– Han ringte oss torsdag og spørte om vi kunne vera på Svalbard med drone, flygar og fotograf på sundag.

– Av praktiske årsaker lot ikkje det seg gjera. Vi måtte senda batteripakkar på 20 kilo med flyet og det krev ein del papirarbeid i høve sikkerheit, så vi kom opp der onsdag i førre veke.

"Den er god, neste scene"

Møte med professor Cox og crewet frå BBC blei ei oppleving for Fløysand og dronepilot Øystein Skorpen.

– Det finst knapt nok meir profesjonelle folk enn den gjengen der. Dette er dei beste gutta i klassen.

– Difor var det ekstra gøy å bli brukt av dei.

– Dei visste akkurat kva bilde dei ville ha. Vi fekk beskjed om å fly og filma slik og slik.

– Normalt så tek ein jo gjerne både fire og fem opptak. Her sto regissør og såg på monitoren, etter eitt, maks to opptak så kom meldinga "Thanks. We got it", smiler Fløysand.

Har tatt av

Foto og filmproduksjonen ved hjelp av drone, eller multikopteret, som Fløysand lik å kalla det, har tatt av for Varde etter at dei i februar fekk lisensen på plass frå Luftfartstilsynet.

– Vi har jo drive med kamera-kraner i alle år, men dette har tatt heilt av.

– No er det slik at vi på dagar med fint vêr filmar for både ein, to og tre kundar.

– Vi hadde ikkje forutsatt kor stor pågangen skulle bli. No er det slik at vi er på nippet til å søkje etter fleire multikopter- og kameraoperatører.

Oppdraga er alt frå film- og TV-produksjonar til reklamefoto og inspeksjonar for byggebransjen.

– Alle som treng å få dokumentert noko frå ein unik vinkel tek kontakt. Til dømes utbyggarar som ønskjer å sjå korleis utsikta blir frå 5. etasje før dei går i gang, avsluttar Anders Fløysand.

Sjå klipp frå filminga Varde gjorde for BBC her

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.