Spekkhoggarar i Bjørnafjorden 2017

Filma spekkhoggarar ved Kobbavågen

Naturfotograf Oddmund Lunde skulle berre fiske pale til havørnene i området - så kom flokken med spekkhoggarar han lenge har venta på.

Av: Kjetil Vasby Bruarøy

Følg livet i Os - følg Midtsiden på Facebook.

Fotograf-ekteparet Liv-Randi Lind og Oddmund Lunde døypte båten sin til «Lykke» etter at dei, dagen etter henting av ny båt sommaren 2011, møtte grindkval mellom Os og Tysnes.

• Les òg: Lykketreff med lykkebåten

Dei siste åra har dei hatt dilla på ørn, og kastar ofte ut fisk til nokre havørner som hekkar mellom Halhjem og Søre Øyane.

Samtidig har dei hatt augene opne for anna dyreliv, ikkje minst mellom februar og april, då det kvart år kjem spekkhoggarar til Bjørnafjorden.

– Dessverre har vi ikkje sett spekkhoggarar sidan vi, saman med Midtsiden, fotograferte spekkhoggarar utanfor Solstrand i 2013, seier Oddmund.

• Sjå bildeserie og video: Spekkhoggarar på spa?

– Då eg endeleg møtte på dei i går, var eg på Røtingaflua for å fiska pale til havørnene, seier den heldige, pensjonerte naturfotografen.

Følgde flokken til Bjørnatrynet

Det var i 10.30-tida at Lunde fekk auge på flokken, mellom flua og Kobbavågen.

– Dei var kanskje og inspiserte området der brua frå Reksteren skal landa, seier fotografen og humrar litt over referansen til det konfliktorienterte E39-prosjektet.

Han følgde flokken inn til Bjørnatrynet, der dei ikkje såg ut til å bry seg mykje om ferja som kom forbi.

– Dei svømte vidare ut på Vernøyane før dei dukka. Eg køyrde tilbake til flua for å fiska, og i 13-tida dukka dei opp igjen. Då følgde eg med dei nordover til Alholmen, men då var dei ikkje like mykje i overflata.

Spekkhoggarane heldt fram nord i Korsfjorden mens Oddmund nøgd reiste heim med bilde og film på minnebrikka.

– Frustrerande og gledeleg

Kona Liv-Randi, som nesten alltid er med i båten, er framleis i arbeid og gjekk glipp av spekkhoggarsafarien.

– Det er jo veldig frustrerande å gå glipp av noko slikt, men eg er samtidig glad på Oddmund sine vegne, seier kona og fotografkollegaen.

– Eg er òg glad for at den fine opplevinga blei fanga på film, så fleire kan ha glede av å sjå desse praktfulle dyra i vår eigen fjord.

• Sjå video: Familien Lekven på spekkhoggarsafari (2013)

Fleire saker