Filmfestival med foredrag om Astrup

– Om vi hadde halde fram med WT-festivalane kvart år hadde vi faktisk vore i vårt 21. år no, fortel Vidar Bratlund Mæland.

Slik vart det ikkje.

I fjor gjorde gjengen bak «WT Os internasjonale filmfestival» og «60 gradar Nord», comeback med ein ny og mikroskopisk filmfestival.

Alt var mindre - 22 sitjeplassar - og dei kjende og storslåtte gallaene var no blitt til ein mikrogalla.

– Skilnaden er at vi er nokre år eldre, nokre born rikare, og i den samanheng går vi inn i dette med ein del føringar frå heimen, sa arrangør Ole Henning Bøe då.

Astrup om Astrup

Årets festival startar med visning av filmen «Osmønstringa 1959» på Luranetunet i dag klokka 12, før sjølve festivalen startar i Solbakkestova i ettermiddag.

I samband med visninga av filmen «Astrup - flammen over Jølster» vil tidlegare kultursjef i Os, og leiar av Fortidsminneforeininga Os lokallag, Ingebjørg Astrup halda ei innleiing.

Astrup-filmen vil òg bli vist på bygdekinoen på Oseana søndag 3. november.

Dagens program vert avlutta med nattfilmprogram ein time før midnatt.

Barnefilm, granitt og comeback

Laurdagen startar med barnefilmfest før det vert visning av video frå årets granittsymposium.

På ettermiddagen laurdag er det tid for to comeback.

«Dead End» av Brian Larkin var ein av dei utanlandske filmane Mæland og co hadde med i programmet på WT-festivalen i si tid. No er oppfølgjaren «Dead End 2» klar for salongen.

I fjor var Pål Winsents film «Kule Kurt - Cowboyen frå Osterøy» på programmet. I den filmen hadde Kurt eit mål om å koma seg til Hollywood. I morgon kan du sjå korleis det gjekk i «Kule Kurt 2 - cowboyen drar til Hollywood».

Langeland om Aurora

Mæland fortel at Pål Winsents er travelt oppteken med å promotera den siste dokumentaren sin, «Gåten Christina», i desse dagar.

– Winsents sjølv rekk ikkje å besøka oss, men vi tykkjer det er stas at vi skal visa «Gåten Christina» laurdag ettermiddag.

Laurdagens filmprogram vert avlutta med kinoversjonen av «En gang Aurora».

Medregissør Benjamin Langeland vil sjølv innleia det som er den lange versjonen av den no prisvinnande filmen om Aurora.

• Les òg: «En gang Aurora» er Nordens beste dokumentarfilm

Pyntar oss litt

Årets salongfestival vert avlutta laurdag kveld med mikrogalla.

– Tradisjonen tru pyntar vi oss litt og gjer litt stas på oss sjølve. Stikk nokon andre innom, vil vi sjølvsagt gjera stas på dei òg, humrar Mæland.