Bildeserie:
Denne helga, som blei avrunda med at A-laget til Lysekloster overtok som serieleiar i 3. divisjon, blei travel i Lysekloster Idrettspark.
Framo Lysekloster Cup samla 80 lag frå Os og omland til cup frå fredag til søndag.
– Vi starta som vanleg med dei eldste, som speler 7-arfotball, fredag og laurdag formiddag. Laurdag og søndag var dei yngste i sving med 5-arfotball, seier dagleg leiar Ørjan Sandal.
Han synest det er kjekt å sjå så mange unge fotballspelarar frå Os og nabokommunane samla på banen.
Unge og vaksne på dugnad
– Arrangementet gjekk kjempefint takka vera enorm dugnadsinnsats. Foreldre stiller opp med kakebakst og som vaktar og dei eldre spelarane våre, ungdmar og vaksne, styrer med alt frå kiosk til dømming.
– Vi vil også takka deltakarane for flott innsats og for fleksibilitet. Eit og anna lag som ikkje kunne stilla blei raskt erstatta av velvillige lag som gjerne tok ein kamp eller to ekstra, seier Sandal.
Cupen er for spelarar frå 6 til 12 år og, i tillegg til mange klubbar frå Os, kom det reisande deltakarar frå blant anna Eikelandsfjorden, Tertnes og Fyllingsdalen.