Finn-Erik (70) har ikkje spelt kamp sidan 60-talet

Bildeserie:

1 av 31

Laurdag gjekk årets MidtsidenCup av stabelen på Kuventræ, og det blei i år kjempa i tre klassar; herrar elite, herrar amatør og mixklasse.

The Mobergs stilte igjen, som reindyrka familielag, med Bødtker-brørne i spissen og konkurranseinstinktet på topp.

I troppen var òg ein nykomar, cupens eldste deltakar Finn-Erik Moberg.

– Eg fylte 70 år i oktober, og har ikkje spelt fotballkamp sidan smågutealder, fortel Finn-Erik.

– Har ungane lokka lenge for å få deg med?

– Nei, eg sa sjølv ifrå om at i år ville eg vera med. Eg har spelt fotball med barnebarna, og vore med som publikum, og eg synest det er veldig kjekt. Men no må eg på banen, seier Leif-Erik, før han jogga ut og vann to duellar i kamp mot FC Rosa, som seinare vann klassen.

Finn-Erik har halde seg i form dei siste åra. I 2015 var vi med då han gjekk tur nummer 100 til Liafjellet på 4 månadar.

Far og dotter prestisjetung duell

Mens gatecupen er brubyggar i enkelte familiar, skaper den splid i andre. Ungdomskilden IL såg ut til, for første gong sidan gatecupen skifta namn til MidtsidenCup i 2001, å måtta stå over i år. Men i mangel på amatørspelarar i herreklassen fekk dei med seg nokre jenter som sto utan lag, dermed blei det debut i mixklassen.

På Ungdomskilden IL speler blant andre Tore Sælen. Dottera Kine (18) skulle òg spela i mixklassen, og hadde meldt seg på i siste sving, men ikkje på pappa Tore sitt lag.

– Det blir krig! sa Kine før kampstart mellom Tikitaka og Ungdomskilden.

Tikitaka hadde òg med seg Vilde Drange Veglo frå damelaget, og dei to skulle no spela mot pappa Tore og Vilde si lagvenninne Vy Nguyen. Tiktaka fekk overtaket, men sleit med å skåra på Ungdomskilden sin Dagfinn Norvik. Så fekk Ungdomskilden to nettkjenningar.

– Ah! dette var ein deilig og viktig siger, seier Tore nøgd, etter å ha terga dottera i fleire dagar før cupen starta.

Ungdomskilden og Tikitaka tapte seinare kvar sin semifinale i mixklassen.

• Her er finalistane i alle klassane