Sport | 12. feb. 2012

Fire gull, tre sølv og tre bronse!

Årets første kretscupstemne blei ein suksess for arrangørane frå Os Karateklubb.

Fire gull, tre sølv og tre bronse!
Medaljesankarane frå Os karateklubb samla etter eit vellukka stemne (privat foto)
Andris Hamresundag 12. feb. 2012 19:47

I helga vart det første kretscupstemnet for sesongen arrangert på «bortebane» av Os Karateklubb. Stemnet, som er opne for alle stilartar innan karate gjekk i Laksevåghallen.

- At klubben sat att med ti medaljar då dagen var slutt, sette ein ekstra spiss på den vellukka dagen, seier leiar Heine Øvredal.

Delar si erfaring

Dei siste åra har vore svært gjevande for klubben og dette regionale stemnet viste at det er god ettervekst i alle klassar i klubben.

- Medan dei mest meritterte ungdommane har tevla i utlandet og hausta både premiar og erfaring, har dei yngste jobba godt med oppgåvene sine heime.

- Talenta som for få år sidan kjempa på desse stemna sjølv, fungerer no som barnetrenarar og gjer råd og vink til dei nye medaljehåpa.

- Henrik Reed-Larsen, Tonje Skeie Hjelle og Erlend Slettevold hadde som coachar vakne auge med dei spente deltakarane og sistnemnte vart like godt med i seniorklassen som gjekk til slutt, fortel Øvredal.

Første gong med poeng

I den yngste klassen, der det ikkje er rangering, stilte Kristian Blomberg. Han vann dei tre kampane han gjekk, to av dei med fem poengs margin.

I klassen over, for 12-13 åringar, fekk Mathias Sørensen sølv og Armin Palislamovic bronse etter gode kampar. Tiril Skønberg Haaland hadde lenge gledd seg til å få poeng og vurdering, etter mange stemne i barneklassen.

- Ho fekk tre gode kampar og vann finalen 8-0, smiler klubbleiaren.

Trente for NM

I klassane for 14-15 åringar, fekk Aner Palislamovic bronse i guteklassen og Amanda Njøten sølv i jenteklassen.

- Amanda fekk også gå nokre kampar i juniorklassen for å få trening fram mot NM.

- I den klassa hadde vi tre medaljehåp og alle innfridde,seier ein strålande nøgd Heine Øvredal.

Mons Daniel Haugland vann guteklassen for junior, Vegard Gjøsund tok bronse og i jenteklassen fekk Elena Andres sølv etter ein spennande finale.

Som eit solid punktum for dagen, fekk Erlend Slettevold gull i både kata og kamp for senior og avslutta like godt med 10-1 i finalen.

Åsmund best i EM

Hovudtrenar Cato Bruarøy var godt nøgd med innsatsen og informerte også utøvarane om Åsmund Slettevold sin imponerande innsats i all-style EM i Aserbadsjan.

- For fire år og mange hundre treningstimar sidan var Åsmund i aksjon på dei same mattene som dei unge talenta var no.

- 5. plassen hans i Aserbadsjan var forøvrig den beste plasseringa til Noreg i turneringa, avsluttar ein stolt Heine Øvredal.

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.