Fire viktige forbetringar for Askeladden

Bildeserie:

1 av 4

I 2010 kom den første pilothusbåten frå Askeladden. P66, som no går i tre ulike variantar, har fått selskap av P77, to variantar av P80 og veslesøstra P60.

På båtmessene som no står for tur, den nærmaste er «Dra til sjøs» som opnar på Sotra torsdag om ei veke, viser båtprodusenten frå Os nye Askeladden P79 Weekend.

5 knop raskare trass auka vekt

Den vil etterkvart erstatta P80. Trass at den er 10 cm kortare, er P79 tyngre, men det nye skroget er raskare.

– Vi fekk den frå fabrikken til hovudkontoret i Askvik før jul. No har den vore gjennom sertifisering og testing med ulike motorstorleikar, seier Henrik Askvik.

Båten har fått eit heilt nytt og moderne 2 stepp-skrog, integrert motorbrakett og djupare V-botn. Dette gav effekten båtdesignarane var på jakt etter.

Mens P80 går i 36 knop med 250 hk og 39 knop med 300 hk, får du nye P79 opp i 41 knop med 250 hk og 44 knop med 300 hk Suzuki.

– Dette er vesentleg forbetring både i fart og drivstofforbruk, i tillegg til av den djupare V-botnen gjer båten meir komfortabel i bølgjer.

På høgde med båtførar

Dei tre andre av dei mest vesentlege forbetringane på nyvinninga P79 er desse:

• Lukka kabin i front
• Større og betre førar- og passasjermiljø i styrhuset
• Auka kapasitet og komfort, både når det kjem til overnattingsplass, sitjeplass og pantry (kjøkken)

– Å få eit godt skilje mellom kabinen og «dagstova» oppe med førar trur eg har vore etterlengta av fleire som køyrer pilothusbåtar. Vi har fått inn ei god skyvedør. Å halda denne lukka under køyring tar dessutan vekk mykje støy frå skroget, så det blir mykje lettare å sitja å prata oppe i styrhuset.

Der utviklarane har jobba mest intenst er med tilpassingar av førarmiljøet.

– Eg synest at både vi og konkurrentane ikkje har hatt gode nok førarmiljø. No synest eg vi har fått til noko som passar både høge og låge båtfolk, der både ratt og tilkomst til styring av ulikt utstyr er innan rekkevidde frå komfortabel sitjeposisjon.

På messa i Oslo skal P79 med «soft-top» visast for første gong. Med denne løysinga kan førar trø opp på eit nivå og få hovudet opp av takluka for betre sikt eller kommunikasjon med folk på utsida.

Overnatting og sitjeplassar

P79 har auka kapasiteten og løfta nivået til passasjerane. Dei fleste pilothusbåtar i dag har 1,5 sete ved sidan av førar, i den nye Askeladden er det plass til to vaksne, kraftige karar ved sidan av kvarandre.

Dei andre passasjerane i styrhuset sit no i same høgde.

– Det er mest vanleg at førar sit på sin høge hest, mens passasjerane har vore på eit lågare nivå. No er sitjeplassane til passasjerane løfta på høgde med førar. Dei får betre utsikt og det blir meir sosialt. Med mindre støy frå forkabinen, og førar på same høgde, er det lettare at alle er inkludert i samtalane.

Nytt er også stikk-køy. Inkluderer vi dobbelsenga i forkabinen og to overnattingsgjestar i styrhuset er kapasitet på totalt fem i pyjamas.

– Resten av båten er òg betre rigga for overnatting, med betre toalett- og pantryfasilitetar.

Utandørs har P79 adoptert miljø frå daycruisersegmentet, med L-sofa og plass til bord for ei sosial stund utandørs.

– Det er lagt til rette for solseng og vi har ein rygg på benken akter som kan vippast sånn at passasjerane ser bakover, for eksempel om badeplattforma er i bruk.

– Pilothus er praktisk heile året, Askeladden P79 har gitt eit løft for både vinter og sommar, meiner Askvik, som no ser fram til å visa den nye båten på messene som kjem.

Tekniske data:
Designkategori: C
Lengde: 7,85 m
Bredde: 2,80 m
Vekt uten motor: Ca. 2.500 kg
Drivstoff: 230 liter
Ferskvann: 100 liter
Varmtvann: 20 liter (opsjon)
Septiktank: 40 liter
Personer: Max. 8
Motor: Outboard 250 - 300 HK
Fartspotensial; Ca. 41 knop med 250 HK
Forbruk Marsjfart 20 – 30 knop Ca. 1,5 – 1,7 L/NM