Fiskeriminister Per Sandberg fekk sjå og høyra om maritim pedagogikk i Skeisbotnen i dag. (Foto: Kjetil Vasby Bruarøy)

Fiskeriministeren fekk hakeslepp

– Det er akkurat dette vi treng, seier Per Sandberg om det maritime fokuset hos Pioner Skeisbotnen barnehage.

image
image
image
image
image
image
image
image
image
image
Av: Kjetil Vasby Bruarøy

Måndag ettermiddag fekk Pioner Skeisbotnen barnehage besøk av fiskeriminister Per Sandberg (Frp) og ordførar i Os, Marie Lunde Bruarøy (H).

Sandberg er på rundreise i Hordaland, og har tidlegar i dag blant anna besøk Havforskningsinstituttet og Akvariet, halde innlegg hos Bergen Næringsråd og vore på auksjon for laksekvotar hos Fiskeridirektoratet.

Då han fekk høyra om det maritime pedagogiske opplegget i Skeisbotnen rakk han til Os før han i morgon skal vidare til Austevoll.

Berøringsbasseng, akvarie og båtturar

Skeisbotnen barnehage, som opna i 2010, er ein av fire barnehagar eigd av osingen Bjarte Nord. To av dei er i Oslo, der han no bur, to andre her i Hordaland. Både den på Askøy og denne i Os har eit  eige maritimt fokus.

Frå Skeisbotnen er det lagt leidning 300 meter ned til sjøen og 200 meter ut i Skeisosen for å henta sjøvatn til akvarie og berøringsbasseng med fiskar, skjel, sneglehus og tang.

– Sjølv om vi bur i ein skjergardskommune er det ikkje alle som får same oppvekst som eg og mange andre på min alder hadde, der vi var med foreldre eller besteforeldre i båt og drog garn eller i fjøra og leitte etter krabbar. Derfor ønskjer vi å gje dette til alle ungane, seier Bjarte.

Barnehagen har 91 ungar, inndelt i avdelingar etter alder. Ved sidan av at barnehagen har liv frå fjøra ved sidan av sandkasse og leikeapparat, har dei tatt på seg ansvaret med å halda friluftsområdet Skeisstøa ryddig. Der har dei òg eigen gapahuk.

– Vi har òg eigen båt, som er i bruk frå påske til oktober. Det året ungane fyller tre år så lærer dei om sjøvett og blir med ut i båt. Alle får seg minst to turar i båt per sesong, fortel assisterande styrar Anne Beate Fagerholt.

– Konsumet må opp

Ungane (og dei tilsette) hang i vindauga då fiskeriministeren gjorde entré i dag. Eit utval av ungane var ute for å ta imot. Så gjekk turen inn til lysbildeframvising og samtale, før Sandberg fekk sjå akvarie og basseng.

Thale Bachmann Eriksen var blant ungane som viste rundt og forklarte, og Fiske-Per lytta og spurde spørsmål.

– Nei, eg vil ikkje bli fiskar, svarte Thale, som seinare fortalde Midtsiden at ho gjerne fangar krabbar, men at ho styrer unna dei største etter å ha fått fingeren i ei klo.

Fiskeriministeren håper at både foreldre og det generelle pedagogiske nivået blir betre når det kjem til sjømat.

– Det er ikkje alle vaksne som har interesse for eller kunnskap om sjøen og sjømat. Ungane våger det meste om du tar dei med, anten det er snakk om fangst og fiske eller sløying og matlaging. Dei som ikkje får eta god sjømat i oppveksten innbiller seg gjerne som vaksen at dei ikkje liker det.

– Skal vi tenkja langsiktig er auka konsum av sjømat faktisk viktig. Skal vi auka den samla matproduksjonen i verda er det nok i havet vi må henta det meste.

– Sjømatkonsumet i Noreg er ikkje stort, og det er dessverre på veg ned, sa Sandberg.

Så fekk han servert fiskesuppe.

– Vi har hatt kokekurs, og då har det naturlegvis gått i sjømat. Vi er òg med på «Fiskesprell», fortel Anne Beate.

 

Fleire saker