Lokal | 23. feb. 2015

Fjerna krav om vilkår

Plan- og bygningsutvalet strauk administrasjonen sine krav om vilkår då dei la ut ByggConsept AS sine utbyggingsplanar på Kuventræ.

Fjerna krav om vilkår
Mange naboar til eigedomen på Kuventræ tok turen til møtet i Plan- og bygningsutvalet og fekk med seg at fleirtalet støtta Harald Døsen frå Ap (midt i bilete) i å fjerna vilkåra (foto: Andris Hamre)
Andris Hamremandag 23. feb. 2015 12:48

Det var trangt i formannskapssalen då plan- og bygningsutvalet handsaman spørsmålet om å legga ut detaljreguleringa for ByggConsept AS sitt prosjekt på Kuventræ til offentleg ettersyn torsdag.

Mange naboar var møtt fram for å høyre politikarane diskutera planen, men gjekk skuffa derifrå etter ei relativt rask behandling, der utfallet blei at fleirtalet av politikarane strauk vilkåret administrasjonen hadde tatt med for at planen skulle leggast ut.

Her er vilkåret administrasjonen ville stilla:

«Planforslaget har høg grad av utnytting og kompliserte støyforhold. For at utbygginga i større grad skal legga til rette for ei utvikling som gir ei god og heilskapleg løysing med tanke på bustadmiljø, gode uteopphaldsareal for barn og vaksne og god estetisk tilpassing til eksisterande natur og bygningsmiljø, ber Plan- og bygningsutvalet om at planen i høyringsperioden blir revidert i tråd med moment tatt opp i saksframstillinga.»

– Inngang på bustadmarknaden

Den første som tok til ordet for å fjerna vilkåret var Harald Døsen (Ap).

– Vi veit at ByggConcept har jobba lenge med denne planen. Dei har mellom anna vore hos husbanken for å få tilrådingar. Dette er bustadar for førstegangsetablerarar og kan gje ungdom ein inngang på bustadmarknaden, noko vi ser som veldig positivt.

– Prosjektet vil heller ikkje øydelegga for sentralidrettsanlegget og dei har klart å finna løysningar i høve støykrava.

– Alt i alt så går Arbeiderpartiet for dette, men vi vil kutta tilrådinga frå administrasjonen frå der det står på vilkår.

– Vi stiller ingen vilkår, men lar planen leva sitt eige liv. Legg den ut på høyring, så ser vi kva den ber med seg.

Ba om 3D-visning

Døsen fekk støtte frå Gustav Bahus (Frp), som fortalte at Frp og H gjekk inn for det same som Døsen.

Samtidig ba han tiltakshavar ta særs omsyn til estetisk utforming av p-hus og støyskjermar.

– Vi vil òg gjerne få ei 3D-visning neste gong saka kjem opp, la Bahus til.

– Tviler på om det er rett

Øystein Nordvik (TvS) var ikkje like sikker på at utbygginga berre var positiv for området.

– Dette området ligg like ved ei anna stor sak, nemleg sentralidrettsanlegget. Kva areal som trengs til det om 10-30 år fram i tid veit vi lite om.

– Som Arne Bjoarvik (H) påpeiker har næringsverksemda eit godt rotfeste der med den tungtrafikken den medfører.

– Saman med den trafikken som vil koma som følgje av ei utbygging så tviler eg på om det er rett tid og rett plass å kila inn eit bustadfelt som dette, forklarte Nordvik, som saman med Sigrid Aanestad Bakke (KrF) og Torill Keys (Ap) gjekk inn for administrasjonen sitt framlegg.

Administrasjonen sin konklusjon

I saksframstillinga har administrasjonen gjort ei rekkje vurderingar mellom anna omkring talet på bustader og bygningsstrukturen. I sakframlegget konkuderar administrasjonen med følgjande:

«Forslag til reguleringsplan har behov for revidering før 2.gongshandsaming, men kan leggjast ut til offentleg ettersyn på vilkår.

Administrasjonen anbefaler at ein revurderer tettleiken opp mot graden av utnytting som vinnar av konkurransen for Kuventræ la til rette for. Det vart lagt ned mye arbeid i konkurransen, og administrasjonen kan ikkje sjå at mange av kvalitetane ved vinnarutkastet er vidareført i dette prosjektet.

Planforslaget har høg grad av utnytting og kompliserte støyforhold. For at utbygginga i større grad enn føreliggande forslag skal legga til rette for ei utvikling som gir ei god og heilskapleg løysing med tanke på bustadmiljø, gode uteopphaldsareal for vaksne og born og estetisk tilpassing til eksisterande natur og bygningsmiljø, ber me om at fylgjande punkt vert avklart/revidert før 2.gongshandsaming (lista er ikkje uttømmande):

  • Grad av utnytting er vesentleg høgare enn det konkurransejuryen fann forsvarleg, og må revurderast før 2.gongshandsaming.
  • Hovudgrepet for strukturen bør revurderast og i større grad tilpassast tilhøve for støy.
  • Forslag til føresegn frå støyrapport må leggjast til føresegna.
  • Utforming av støyskjermar må i høgare grad detaljerast før 2.gongshandsaming.
  • Bygningsstrukturen synast ikkje godt nok tilpassa brukargruppe med tanke på kontakt mellom inne- og uteareal. Det bør vurderast fleire bustader med inngang direkte på bakkeplan.
  • Det bør og leggast til rette for rekkehus eller liknande – bustader over 90m2 med minimum 3 soverom.
  • Høg utnytting gjer at planen har behov for høgare detaljgrad før 2.gongshandsaming.
  • Utforming av tiltak må i større grad ta omsyn til landskap og eksisterande områdekarakter.
  • Det må vurderast korleis eksisterande vegetasjon kan bevarast som element i uteområda.
  • Det må før 2.gongshandsaming, utarbeidast situasjonsplan, 1:500, der det planleggast meir i detalj kva kvalitetar det skal leggast til rette for på utomhusareala.
  • Geologiske tilhøve bør opplysast i planarbeidet.»

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.