Action i hamna: Marthe og Christoffer i Fjordfolk. (Foto: Kjetil Vasby Bruarøy)

Fjordfolk vil bruka hamna under Osdagane

Maritime marknadsdagar: Padling, dykking, test av Askeladden, tokt med vikingskip og kommunen sin nye aktivitetspark ved gjestebrygga.

image
image
image
Av: Kjetil Vasby Bruarøy

I dag opnar årets marknadsdagar i Os sentrum, torghandel- og aktivitetsdagane som no har namnet Osdagane. Arrangør Os Sentrumsforening står denne sommaren utan tilsette, og har derfor hyra inn det nystarta, lokale eventbyrået Fjordfolk. Tidlegare i juni har dei laga både Champions League finalefest i Oseana og hagefest på Bjørnafjorden Hotell. No vil Christoffer Kobbeltvedt og Marthe Kristensen setja ein spiss på Osdagane.

Tivoli og nye utstillarar

– Osdagane blir som før, med torghandel frå torsdag til laurdag, tivoli på grusplassen ved Os ungdomsskule, moteshow på torget og andeslepp i Oselvo. I tillegg til at dei fleste butikkane flyttar ut på gata har vi passert 20 andre utstillarar. Nokre er tilreisande, andre har butikk i Os, men ikkje i sentrum.

Blant nye utstillarar i år er Os Bilsenter, som tidlegare i år opna butikk i Industrivegen, og Grønt Fokus, som sel hagestover frå leigd areal på Plantasjen.

– Elles ligg det an til å bli ekstra med liv i Brugata. Den stenger vi for biltrafikk heilt ute ved Capri, og dei nye og nyare butikkane i gata, som Duga og Tiny med Strikkebutikken og Dysvik, har signalisert at dei vil gjera litt ekstra ut av Osdagane.

Legg vikingskip ved ny sykkelbane

Os kommune vil få klar den nye aktivitetsparken langs gjestebrygga nær Capri, der største installasjon er ny pumptrack, ein bane for sykkel, skateboard og sparkehjul. Nær parken vil Bygstadskipet ha «stasjon».

– Her vil dei, til sponsa pris, tilby korte vikingtokt i Os hamn for ungar. Båten er bygd med utgangspunkt i Gokstad-skipet, og med skipet kjem det ein skipper som vil
fortelja vikinghistoriar.

Vil du på padletur?

På motsett side av hamna, ved Oselvarverkstaden, vil eit anna nystarta firma ha base. Bjørnafjorden Opplevelser stiller ut med Nemo, både i sentrumskjerna og ved Oselvarverkstaden, med tilbud på både dykkarutstyr, dykkarkurs og padlekurs. Dei vil dessutan ha med seg kajakkar som du kan få testa i hamnebassenget, etter ein kort introduksjon.

Blant utstillarane er òg den lokale Askeladden-forhandlaren Båtens Beste, som har båtar med seg for prøvekøyring.

– Saman med Skulptursymposiet vil vi vera med på å laga livlege dagar, frå Vognhallen via brygga og heilt opp til grusplassen, seier Marthe og Christoffer.

Fleire saker