Fleire båtar knust i vinden

Laurdag i 23-tida fekk brannvesenet melding om båtar som såg ut til å ligga laus i marinaen utanfor Os Sjøfront og Oseana.

– Det ar mykje vind og høge bølgjer, fortel Terje Håvardstun frå Os brannvesen.

Brannvesenet sikra seks båtar og fekk tak i eigarane til fire av dei større båtane i hamna.

– Vi fekk tatt fleire båtar innanfor gamlemoloen i den nye hamna.

Ein av båtane som er skadd er ein Princess på 42 fot.

– Vi frykta at den skulle gå ned og ta med seg heile bryggesystemet. Men vi fekk hjelp av redningsskøyta til å berga båten.

I 5.30-tida laurdag morgon kom melding om fleire forliste båtar på Hatvik.

– Her hadde to båtar gått ned og ein annan låg og banka mot land.

– Men det var så ekstreme forhold at vi ikkje kunne utføra nokre tiltak utan for høg risiko.

Brannvesenet er no på veg til Hatvik igjen med pumpe, for å sjå om båten som låg og banka mot land let seg berga.

– Ver varsam om du skal ut og sikra båten din i dag! Hugs redningsvest, seier politibetjent Tom Johannessen.

Politiet sperra i går av hamna utanfor Os Sjøfront for å unngå at folk bevegde seg ut på moloen og bryggene.