Fleire oppdrag for redningsskøytene i Vestland
Utførte totalt 309 oppdrag i fylket i perioden 1. mai til og med 31. august.
Redningsselskapet har hatt fleire assistanseoppdrag i Vestland i sommar samanlikna med fjoråret.
Talet på søk- og redningsoppdrag har likevel gått ned, skriv Redningsselskapet i ein epost i dag.
Redningsskøytene utførte totalt 309 oppdrag i fylket i perioden 1. mai til og med 31. august. Det er ein auke på 10 prosent samanlikna med i fjor.
Flest oppdrag vart løyste frå stasjonen i Bergen etterfølgde av Grimstadneset og Florø.
Dei aller fleste av oppdraga var retta mot fritidsbåtflåten, og dei vanlegaste oppdragstypane var:
- assistansar ved motorstopp
- tau i propellen
- lekkasjar
- grunnstøytingar
– Den klart største andelen av fritidsfartøy er i Sør-Noreg. Bra sommarvêr gir auka trafikk på sjøen. Våre faste og frivillige mannskap har verkeleg stått på i sommar, seier Gorm Hillgaar, maritim direktør i Redningsselskapet.
Færre søk- og redningsoppdrag
Ein gledeleg trend i sommar er at talet på alvorlege oppdrag i fylket, såkalla søk- og redningsoppdrag (SAR), har gått ned med over 20 prosent samanlikna med fjoråret.
I sommar var redningsskøytene involverte i 43 SAR-oppdrag, mot 56 året før.
Flest SAR-oppdrag i fylket vart utløyst av personar i nød, framdriftshavari og søk etter sakna.
– Det fremste oppdraget på redningsskøytene er å sikra god beredskap. Gjennom låg responstid kan me førebyggja alvorlege ulykker. Mange hendingar i sommar vart løyste før dei rakk å utvikla seg til redningsoppdrag, seier Hillgaar.
To liv redda i Vestland
Redningsselskapets visjon er at ingen skal drukna. I sommar redda mannskapet 10 liv på landsbasis, to av liva vart redda i Vestland.
Over 40 prosent av oppdraga i Vestland vart utførte av frivillige mannskap i Redningsselskapet.
Fleire oppdrag på landsbasis
På landsbasis gav sommaren ein auke i talet på oppdrag for Redningsselskapet, men færre alvorlege redningsoppdrag med høvesvis 3.745 oppdrag totalt og 405 søk- og redningsoppdrag.
Redningsselskapets assistansetelefon, 02016, fekk i sommarperioden inn over 8000 telefonar.
6 av 10 førespurnader vart løyste over telefonen og behovet for assistanse vart unngått.
FAKTA – Vestland (2025)
- Talet på oppdrag: 309 (+10 % frå 2024)
- Assistansar: 261 (+25%)
- SAR-oppdrag (Search And Rescue): 43
- Fartøy assisterte: 250 (+25 %)
- Fartøy berga: 3
- Liv redda: 2 (mot 1 i fjor)
