Fleire turar til Austlandet og stor utskifting i troppen

Før helga kom avdelingsoppsettet i 2. divisjon og kampoppsettet for avdeling 2.

Sotra og Bjørnar rykte ned og Gneist rykte opp til 1. divisjon frå Os si avdeling i vår, og berre eitt lag frå Hordaland, Årstad (opp frå 3. divisjon) har kome til før sesongstart 2018/2019.

– Andre nye i avdelinga vår er Nordstrand, som kom på 2. plass i naboavdelinga vår etter førre sesong, og Runar (frå Sandefjord). Vi køyrer dobbeltkampar når vi reiser austover, men det betyr altså at det blir tre turar til Austlandet neste sesong, mot to tidlegare, seier Gitter Torp.

Runar landa i utgangspunktet under streken, men fekk tilbod om vidare spel i 2. divisjon.

Gitte steppa opp frå assistent til hovudtrenar etter sesongen som gjekk. Med seg i trenarteamet har ho Trond Budal.

– Det er tredje sesongen no at vi har kampar på Austlandet. Denne sesongen får vi to før jul og éin etter jul. Det skal gå heilt greit med litt ekstra med reising.

Kan mista 8 spelarar

Os er godt i gang med sesongoppkøyringa, men med langt yngre stall enn før.

– For det første har vi 2. og 4. divisjon som same treningsgruppe no, noko som fungerer godt. For det andre er det dessverre litt mange av dei meir erfarne som har gitt seg.

Desse gir seg: Hilde Kristine Røttingen, Emilie Halhjem, Elise Hjelle og keeper Tiril Grønvigh.

– I tillegg er Madeleine Hjertnes og Marie Henriksen Håland i tenkeboksen, og Liv Pauline Lunde skal vekk eit år på skule og Mia Torp Nielsen skal operera i beina og blir neppe å sjå på banen dette året.

Har tru på dei unge

Trass stor utskifting trur Gitte at Os skal kunna bita godt frå seg i 2. divisjon også i komande sesong.

– Når vi ser kor bra det har gått med dei yngre vi har hatt med oss dei siste sesongane, så trur eg det skal gå fint. Men det blir nok òg sånn at vi får enkelte frå andre klubbar inn på prøvespel.

– Vi får dessutan to flinke, lokale spelarar tilbake til bygda, Marthe Høyerholt Færøvik og Ida Wik, som gjekk til Bjarg J17 då laget deira på Nore Neset gjekk i oppløysing.

Den siste tida har det vore 24-25 på trening.

– Det er ei ung og veldig treningsvillig gruppe. Oppkøyringsmessig skal vi stilla sterkare enn nokon gong før, seier Gitte.

Det blir ingen treningsleir i utlandet denne sommaren, men ei samling på Kuventræ med heile gruppa i august, og så ei samling med 2. divisjonslaget på Stord, der dei skal spela tre kampar før seriestart.

Os har seriestart borte mot Åsane søndag 16. september.