Fleire vegar stengt – politiet får hjelp av sivilforsvaret

Bildeserie:

1 av 2

Vinden har løya noko, men framleis er det kraftige vindkast.

Rundt halvparten av bustadane i Os utan straum. Uvêret har også ført til mange rotvelt over vegane i Os og fleire av desse blir stengt til i morgon.

Sivilforsvaret er kalla inn av operasjonsleiar i Hordaland politidistrikt, og kom til Os i 19.30-tida. Dei skal blant anna ut for å hjelpa med dirigering på Halhjemsvegen.

– Hatvikvegen er stengt. Der ligg det fleire tre over vegen og straumkablar, og det er ikkje forsvarleg å jobba der før vinden har løya meir, seier Christine Grindstein.

Omkjøring er via Midtbøvegen.

– Heldigvis er ingen personar skadd, seier Grindstein.

E39 stengt ved Haugland

Over E39 Halhjemsvegen ligg det nokre velta lyktestolpar.

Også her må arbeidet venta og det er dirigering på staden og omkjøring via gamlevegen frå Haugland til krysset ved Halhjem Kafé.

Øyane og Strøno

– Ved Lepsøybrua heng nokre tre over vegen og sperrar for større bilar. Over Strønevegen fekk vi nyleg også beskjed om om at det no ligg tre over vegen og heng i nokre leidningar.

– Vi er på veg ut for å sjå på saka, men det går truleg ei god stund før vi får gjort noko med det, seier varabrannsjef Arne Monsen.

Tidlegare i dag kappa brannvesenet 19 tre berre på Lyseklostervegen, på eit strekk på 150 meter.

– Trea ramla ned mens vi kappa, eit av dei landa på taket på ein bil.