- Flytt deg, eg skal spela!

Bildeserie:

1 av 3

Ole Reinert Berg-Olsen treng ikkje skubba så mykje i naboen og kunstnaren Arne Mæland, det er for lengst bestemt at Osøren Blues & Jazzfestival får bruka Vognhallen også i år. Kunstnarane som arbeider under Skulptursymposiet trekk bort i sørenden av hallen i forkant, og får tilbake fullt areal når festivalen er ferdig.

- Det blir flott å spela i Os igjen! Her har vi eit trufast og livleg publikum, nokre av dei stilte til og med opp og lagde leven under utdelinga av Spellemannsprisen, seier den ganske ferske prismottakaren ORBO.

- Korleis har tida etter Spellemannsprisen vore?

- Utdelinga var midt i plateinnspelinga vår, så vi heldt fram med å jobba med albumet og var ferdig i studio rundt februar-mars.

Framleis står ein del produksjonsarbeid igjen før den første singelen kan sleppast.

- Det kjem nok ein singel like etter sommaren, og så slepp vi det som blir vårt fjerde album ein gong i haust.

Testa materialet i USA
Ole lovar å spela to-tre av dei tolv nye låtane under konserten på Os fredag.

- Det blir ei hardtslåande poprockplate, eg har aldri sett så mykje fram til eit plateslepp som no. Responsen frå osingane fredag er eg også spent på, seier ORBO.

I mai var rockaren frå Os i byllaup i USA. Då hadde han også kontakt med musikarkamerat Steve Ferrone. Ferrone har tromma for blant anna Tom Petty, og inviterte Ole på grillfest heime hos seg sjølv.

- Det blei ein kjekk kveld, der eg også fekk gje frå meg ein demo med nokre låtar på. Steve likte musikken godt, og spesielt den eine låta, som han sa han ville spela for Petty. "Tom´s gonna get a kick out of this", meinte han.

Spreidd sommarprogram
Etter festivalen på Os skal ORBO & The Longshots spela på Kongsberg Jazzfestival, på Tysnesfest, i Langsund og på Varangerfestivalen.

- Det blir ein del reising i sommar, men eg håpar det også blir tid til litt avslapping heime i Os. For hausten blir nok travel, trur han.

- Vi har jobbar fram til februar, men hausten er meir eller mindre rydda for turné etter platesleppet. Kvar turneen går er førebels ikkje bestemt, seier ORBO.