Flyttar andesleppet ei veke

Os Håndball arrangerer i år «Andeslepp» i Oselvo for femte året på rad.

Sjå video frå 2017: Suveren vinnar-and

– Då vi planla årets andeslepp var vi inne på sidene til sentrumsforeninga for å sjekke datoen for marknadsdagane. Diverre fekk vi ikkje med oss at det var fjorårets dato som framleis sto der då vi satte datoen, så vi bomma med ei veke. Difor har vi bestemt oss å utsetja det ei veke, til laurdag 30. juni, slik at det blir samstundes med Osdagane.

– Det betyr at dei som allereie har adoptert ei and og fått "adopsjonspapira" (loddet, journ.mrk) må vera obs på at sleppet blir den 30. og ikkje 23. juni som det står der, seier andegeneral Tore Hisdal.

Den viktigaste dugnaden

Andesleppet blir arrangert på tradisjonelt vis ved at badeendene blir slept frå gamlebrua i Oselvo klokka 14. Så er det får enden å komma seg raskast mogleg ned til mål ved handicapbrygga.

– Som tidlegare år er hovudpremien eit gåvekort på 10.000 kroner.

– Kvifor arrangerer de dette løpet?

– Dette er den største og viktigaste dugnaden for handballgruppa. Det er den største enkeltinntekten vi har og den som gjer at alle dei 300 medlemmane våre kan spele handball.

– Faktisk så har overskotet frå løpet dekka heile påmeldingsavgifta til serien dei siste åra. Det håper vi sjølvsagt det skal gjera i år også og at osingane også i år vil støtta handballgruppa med å adoptere ei eller fleire ender. Medlemmane våre er allereie ute og sel adopsjonspapirer. Om ein ikkje får besøk av dei, så vil vi også selgje på sjølve løpsdagen, avsluttar Hisdal.