Flyttar inn i ny verkstad til 30 mill

Bildeserie:

1 av 12

Planane om å bygga om eit av dei fire store bygga til Os vgs, D-blokka, starta i 2012. Det kom pålegg frå Arbeidstilsynet med krav om ei anna løysing for sveiseundervisinga. Eksisterande hydraulikkverkstad hadde òg ei utforming som ikkje tilfredsstiller nye krav til høgder og ventilasjon.

– Det var lenge snakk om ei ombygging til rundt 20 millionar kroner, i staden blei det nytt tilbygg på 600 kvadratmeter, til 35 millionar, om vi tar med prosjekteringskostnadane - saman med ombygging av eksistarende bygg, seier rektor Johan Henrik Lassen.

Rivinga og byggearbeidet starta rett etter at dei fekk midlar, våren 2016 - no er det meste ferdig innflytta og tatt i bruk. Det er Fronta Gruppen frå Stord, som òg bygde det nye bygget til Os Asvo, som har reist tilbygget.

– Dei skal bygga vegane våre

– Blant elevane har vi dei som skal bygga vegane våre i framtida, siste innspurt på Svegatjørn-Rådal, ny veg mellom Stord og Os og mellom Bergen og Voss - og som skal halda anleggsmaskinene i drift. Vi har fleire landslinjer ved skulen og sender blant anna 60 anleggsmaskinførarar ut i arbeidslivet kvart år, seier rektor.

Blant tidlegare elevar ved skulen er TV-kjendis og Farmen-deltakar Leif Einar «Lothepus» Lothe.

– Dei fleste arbeidsgjevarane vil helst ha dei som går ferdig begge to åra, at dei kjem ut ferdig med kompetansebevis. Så og seia alle går direkte i lære.

– Alt er enklare

No kan elevane ved VG1, 2 og 3 innan sveiseteknikk, saman med elevar innan både arbeidsmaskin-mekaniker VG2 og anleggsmaskin-mekaniker VG3 boltra seg i store, nye verkstadar med god takhøgde, frisk luft og mykje nytt utstyr.

– Det er meir utstyr på veg, vi har bestilt nytt verktøy og utstyr for 2,5 millionar kroner. Verkstadane våre har blitt svært funksjonelle og moderne, det er nok ei og anna bedrift som misunner oss desse fasilitetane, seier avdelingsleiar for bygg- og anleggsfag, Lasse Svellingen.

– Alt er enklare her, seier elev ved anleggsmaskin-mekaniker VG3, Kristine Egeland frå Rogaland.

Før måtte dei skru hytta av dei høgaste anleggsmaskinene for å få dei inn under tak. Då dei tappa olje måtte det berast ut i store kanner.

– No har vi eigne servicestasjonar med trykkluft, eksosavsug, grease og fleire typar olje. Røra ligg i golvet. Alt er datatstyrt så vi veit når det nærmar seg tomt, og spelolje blir no tappa ned på ei eiga vogn som er lett å trilla ut, forklarer Svellingen.

Søker om nye 20 millionar kroner

Eksisterande D-blokk er bygd om. Her har gamle varkstadar blitt til klasserom, kontor, garderobe og varemottak, mens delar av blokka er integrert i tilbygget med store, nye verkstadar.

– Verkstadane har eit ventilasjonsanlegg på storleik med ein leilegheit og til kostanden av ein einebustad. Det er lagt opp til ny ventilasjon òg i den ombygde delen, men her står det litt igjen.

Eigedomsavdelinga har søkt om yttarlegare 20 millionar kroner til oppgradering av D-blokka. Samtidig rosar dei byggherre Hordaland fylkeskommune for prosessen dei nyleg har vore gjennom.

– Fylkeskommunen har lytta til oss på avdelinga og vist stor velvilje, sånn at verkstadane og bygget har blitt best mogleg tilpassa vår bruk og undervising, seier Svellingen.