Føler med Jarle Trå

Travelnet Os Reisebyrå har sendt klatraren Jarle Trå på tur i mange år. - Vi både følgjer med og føler med, seier Kjersti Fjellvang.

Kjetil Vasby Bruarøyonsdag 27. mai 2009 19:41

Den erfarne klatraren Jarle Trå blei laurdag meldt sakna. Han var på veg til å klatra til toppen av Mount Everest, åleine og utan oksygen. Tre dagar seinare blei han funnen, og no er han på sjukehus i Kathmandu.

- Det har vore nokre spennande dagar. Heldigvis fann dei han, og heldigvis har media dekka det godt. Vi ha følgt med og vi har følt med, seier dagleg leiar ved Os Reisebyrå, Kjersti Fjellvang.

Fullt program for 2009
Os Reisebyrå har sendt Jarle Trå på tur i fleire år, og han har bestilt turar for heile 2009 hos byrået på Os.

- Vi har blitt godt kjent opp gjennom åra. Eg er så glad for at han blei funnen, og eg håpar han kjem seg etter dagane i fjellet.

I januar hadde Trå ekspedisjonskveld på Os, og fleire meldte seg på tur til Machu Picchu i Peru seinare i år.

- Den turen er det ein annan som skal guida, men vi har fleire turar for Trå seinare i år, fortel Fjellvang.

UD på telefonen
På spørsmål om ho har hatt kontakt med det offentlege etter at Trå blei sakna, fortel Kjersti at ho har hatt UD på tråden.

- Dei ringte for å høyra om kva forsikring han har. Det kjenner eg ikkje til, så der fekk dei ikkje noko svar.

- Så UD tok seg tid til å sjekka med forsikring før dei kom seg av garde for å henta han? Korleis reagerte du på det?

- Eg reagerte ikkje noko særleg på det. Det eine treng ikkje utelukke det andre, dei har nok vore fleire på saka, og derfor hatt tid til å sjekka det meste medan dei venta på løyve frå kinesarane til å gå inn med helikopter.

Jarle Trå blei funnen 6600 meter over havskorpa. I kveld viste bt.no dei første bilda frå redningsaksjonen. Dei kan du sjå her.