- Følgde planen

Åkra hadde ikkje tapt på dei sju siste kampane før dei møtte Os på Kuventræ laurdag.

- Vi visste at Åkra er eit vanskeleg lag å møte.

- Difor skulle vi spele samla, også når vi gjekk i angrep, forklarar trenar Tore Nielsen som hadde ansvaret på benken medan hovudtrenar Tim Henrik Sperrevik opplever OL i London.

Forrykande start

Os tok kommandoen frå start. Etter berre fire og eit halvt minutt fekk Os corner som Erik Kanestrøm slo inn foran kassa. Etter litt klabb og babb blir Preben Borgen ståande aleine med ballen og klinkar den i lengste hjørnet.

To null kjem berre fem minutt seinare når Christer Olsen legg hardt inn i retning av Erik Kanestrøm. Ein Åkraforsvarar freistar å klarera, men set ballen i eige mål.

Os-Åkra 2-0 (2-0)
Målskårarar: Preben Borgen og Christer Olsen
Gule kort: Tore Valvik, Preben Borgen og Børge Borgen
Os sitt lag: Anders Kloven, Tor Erik Berge (Børge Borgen), Stian Lunde, Torkel Hjertnes, Per Meria, Tore Valvik, Preben Borgen, Ramo Racic, Erik Kanestrøm, Anders Kinden, Christer Olsen (Espen Kopperud).

Strålande Tore

Andre omgangen startar med at Åkra dyttar tre mann på topp, noko som gjer at Os blir pressa bakover.

- Vi brukar ti minutt av omgangen før vi får justert oss.

- Heldigvis har vi to dyktige mann i defensiv midtbane som ryddar godt opp.

- Spesielt vil eg trekke fram Tore Valvik i dag. Eg trur ikkje eg har sett ein betre kamp av Tore sidan eg starta som trenar på Kuventræ, seier namnebror Tore.

Brenn for mykje

Etter at Os fann ut av omlegginga til Åkra kom dei meir med i kampen igjen og var frampå med fleire sjansar. Diverre er Osherrane for ubesluttsomme framfor mål og brenn fleire 100% sjansar.

- Vi burde skåra iallefall åtte mål.

- Eg er nøgd med kampen totalt sett, men ikkje med spelet på den framste 1/3-delen av bana. Der er vi for slurvete, slår Tore Nielsen fast som pustar letta ut av at han opprettholdt den gode heimestatistikken i hovudtrenar Sperrevik sitt fravær.

VIDEO, 2:38: Sjå måla og mange av dei brente sjansane (foto: Andris Hamre)