Folk flyktar frå kulda

Med regn og temperaturar på rundt 13 gradar så har ikkje sommaren så langt vore heilt det mange har håpa på.

Det er noko reisebyråa og turoperatørane får kjenna på.

Folk er desperate

Hos Os Reisebyrå ringer telefonen i eitt.

- Folk er desperate etter å koma seg til varmen, seier Jelena Lunde, senior reisekonsulent i Os Reisebyrå.

- Dei ringer og ber oss hjelpa dei vekk frå kulda.

Lunde fortel om stor auke i pågangen den siste tida og trur at mange av siste liten-kundane eigentleg hadde tenkt å feriera i Noreg.

- Kvar reisa går er dei ikkje så nøye på, så lenge det er til ein stad med varme, seier Lunde.

Fulle fly til Madeira

Hos turoperatøren Vitaltour får dei telefonar frå folk som fyrer i omnen i juli månad for å halda varmen.

- Vi merker veldig godt med den store pågangen at vêret ikkje er det heilt store her heime, seier dagleg leiar Inger Berit Bøyum.

Vitaltour har kun Madeira som reisemål i sommarferien og sender søndag ned sitt tredje fulle fly.

- Mange kjenner nok at dei ikkje får skikkeleg utbytte av ferien om det ikkje er varmt.

- Vi har endå nokre ledige sete på dei neste flya, men det byrjar å fylla seg opp.

Fleire hoppar på

Hos reisearrangøren Star Tour, som er med i verdas største reisekonsern, TUI Travel PLC, er 85 prosent av julireisene frå Flesland selt.

- Det ustabile sommarvêret gjer at mange nordmenn som i utgangspunktet skulle feriera i Noreg, heller pakkar kofferten og reiser til varmare strøk, fortel Kirsti Irgens Ertsås, informasjonsrådgjevar i Star Tour.

Sjølv om sommaren i fjor heller ikkje var av det varme slaget så var det 18 prosent fleire nordmenn som bestilte seg sydentur førre veke hos Star Tour, samanlikna med same veke i fjor.

- Når regnet høljar ned så aukar salet på sydenturar, og det er fleire og fleire nordmenn som tar hopp på-turar år for år, seier Ertsås, som òg kan fortelja at folk allereie byrjar å sjå seg om etter sydenturar til neste sommar.

- At etterspurnaden etter garantert sol og sommar neste år er så stor blant vêrsjuke nordmenn gjer at vi opnar salet for neste års turar allereie i dag 4. juli.

Både Lunde, Bøyum og Ertsås fortel om få ledige plassar, så om ein drøymer om sol og varme så bør ein ikkje venta for lenge med å bestilla tur.