– Folk tar det med eit smil

Tysdag er det valentinsdag og på AMFI Os er det ei utstilling som i dag får meir merksemd enn andre.

Utstillingsdukker "romantisk" plassert under ein Jerven-duk viser MX Sport sitt oppmuntrande syn på eit av kjeden sine fokusområde; friluftsliv.

Og viss du trudde ein eller annan av dei tilsette kjem til å få kjeft for dette stuntet tar du truleg feil. Det er nemleg sjefen som står bak.

– Alle andre har så sukkersøte utstillingar, vi ville finna på noko anna, seier butikksjef Lars Petter Grønvigh på vegne av seg sjølv og kollega Halgeir Fosså.

– Foreløpig er det ingen som har blitt sure. Men det er bra blikkfang i utstillinga, det er fleire som stoppar opp og tar bilde, legg han til.

Om Jerven-duken kjem til å selja betre enn Kari Traa-truse til valentinesdagen? Vi tviler.