Forbode og forlatt: Det tok ein time å sløkka dette bålet

Klokka 23.55 torsdag kveld fekk brannvesenet melding om opne flammar og mykje røyk frå eit bål på Bøkampen.

– Det var opne flammar frå eit stort bål, og veldig mykje røyk då vi kom fram, fortel varabrannsjef Arne Monsen.

Brannvesenet brukte over ein time på å sløkka bålet, som var tett på skogen. Bålet hadde ein diameter på rundt 10 meter, og besto i hovudsak av tre og greiner.

– Var det fare for spreiing til skog eller bygningar?

– Det var eit uthus eller ei hytte i nærleiken. Det var så mykje røyk på staden at vi ikkje såg den før etterpå. Heldivis hadde det kome nokre byger i går, så faren for spreiing var noko redusert.

Ikkje lov

Frå 27. mai har det vore forbod mot all bruk av open eld i Os og fleire andre kommunar.

Dette forbodet var framleis gjeldande i går, det er først oppheva frå i dag, fredag 15. juni.

– I tillegg har vi det generelle bålforbodet som gjeld frå 15. april til 15. september, mot bål i skog og mark.

– Dette bålet er eit brot på begge desse forboda, og kjem heilt klart inn under kategorien uforsvarleg.

Ingen folk ved bålet

Det var ingen folk på staden og det kom heller ingen mens sløkkearbeidet pågjekk.

Brannvesenet veit framleis ikkje kven som hadde ansvar for bålet.

– Politiet er varsla. Dei var ikkje på staden i går, men her blir det gjort nokre undersøkingar i etterkant.