Forfallet på dei kommunale vegane

Reportasjen etter møtet i tenesteutvalet, kor rapporten om stoda for dei kommunale vegane vart lagt fram, er litt skremmande lesing. Varaordføraren frå Høgre møter varslaren med mistru og kritiske spørsmål. Har vi ikkje i denne tida lært å møta ein som varslar med respekt?

Det er nok lite ønskeleg med ein slik rapport i eit valår, men dette er realiteten etter 16 år med forfall av dei kommunale vegane.

Eg vil oppmoda varaordføraren om å køyra nokre vegar i Os slik at ho kan oppleva forfallet. Køyr langs Øvredalsvatnet (om du tør). Køyr over Langedalen køyr til kraftstasjonen på Gåssand, test Borgavegen og ta deg ein tur over Eidsbrekka.

Varaordføraren hevdar at kommunen ikkje har 30 millionar kroner, som opprustning av vegane treng. Men når overskotet i 2014 var på 48 millionar så finst det rom for å ta noko av etterslepet.

Nokre spørsmål:
• Kor lenge skal Tømmernesbrua ha redusert akseltrykk?
• Kor tid skal vegen langs Øvredalsvatnet rustast opp?
• Kva er planen for reasfaltering? (Gåssandvegen var sist asfaltert i 1984. Sidan har berre nokre få strekk fått ny asfalt)
• Kor tid får vi fleire møteplassar?
• Kor tid får vi fleire og større parkeringsplassar for turgåarar?

Til slutt ei gladmelding: Vintervedlikehaldet har vore godt i alle år.

Jan Gaassand
Os Senterparti