Forfattarspire frå Os

For to veker sidan kom romanen «Det velsignede treet» ut i bokhandelen. Bak boka står ei kvinne frå Os, Annette Grahl Johnstad, og «Det velsignede treet» er hennar forfatterdebut.

– Det er veldig kjekt å ha fått gjeve ut mi eiga bok, synest Johnstad, som bur i Os saman med sonen sin på 10 år.

Tidlegare arbeidde 36-åringen som førskulelærar og styrar i barnehage, men har dei to siste åra vore plaga med sjukdom.

– Eg skriv når eg har energi, fortel ho.

I starten skreiv ho små noveller, men i 2011 fekk ho ideen om det snakkande treet, og byrja på romanen.

Vil læra menneske å lytta til hjarta sitt

Å få publisert boka har ikkje vore berre lett, og Johnstad fortel at ho sendte manuskriptet inn til fleire forlag før Publica fatta interesse.

– Dei har hjelpt meg og eg fekk blant anna ein konsulent til å assistera meg med språket.

Romanen handlar om eit snakkande tre som ønskjer å dela kunnskapen sin om åndeleg naturfilosofi og å læra menneske å lytta til sitt eiga hjarte.

Hovudpersonen er ei kvinne som treet ønskjer å gje visdom og råd.

– Handlinga kjem også innpå det å ta vare på naturen og miljøvern, fortel Johnstad.

Utgjevinga har tydeleg gjeve meirsmak og Johnstad fortel at ho allereie er i gong med ein oppfølgjar.

– Eg har lyst til å skriva mange fleire bøker, seier den nybakte forfattaren.