Næringsliv | 14. aug. 2012

Første natt i sjøfronten

Innflytting i Os Sjøfront: I går fekk dei første kjøparane nøklane sine, tysdag flyttar blant anna ekteparet Sissel og Per Eide-Olsen inn.

Første natt i sjøfronten
Per Eide-Olsen har allereie byrja å nyta livet på terrassen utanfor hus 101 i H-blokka. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøytysdag 14. aug. 2012 12:07

– Vi var ikkje blant dei første kjøparane, men vi fekk akkurat den vi ville ha, seier Per Eide-Olsen med eit nøgd smil på terrassen utanfor leilegheit 101 i H-blokka.

I går fekk han og kona Sissel nøkkelen, i dag flyttar dei inn. For denne veka, nøyaktig to år etter at byggestart blei vedtatt, er det innflytting i dei første leilegheitene i det store eigedomsprosjektet Os Sjøfront.

– Dei første fire fekk nøklane i går, i løpet av veka har alle kjøparane i H-blokka overtatt, seier eigedomsmeklar og salssjef i StorBergen Boligbyggelag, Tone Osland.

– I neste veke er det overtaking i I-blokka, legg ho til.

– Ein overgang

Ekteparet Eide-Olsen hadde høyrt om sjøfrontprosjektet før start, men det var tilfeldig at dei var på Os ein dag det var visning.

– Akkurat då slo vi det frå oss. Men så endra stemninga seg litt, og vi blei klare for noko mindre, noko som er lettare å halda.

Sissel og Per selte einebustaden på Straumsgrend, og mesteparten av innboet, og kjøpte leilegheita nærmast sjøen, nærmast Oseana.

– Det er ein kolossal overgang å gå frå 260 til knappe 100 kvadratmeter buflate. Det blei litt av ein prosess med å velja ut kva vi skulle ta med oss vidare.

– Men vi sorterte ut mykje og la det rett og slett ut på Finn. Og det var utruleg å sjå kor god respons det var og kor langt fleire ville reisa for å kjøpa brukte møblar.

Men Per innrømmer at sorteringa ikkje er heilt over.

– Vi har leig ein konteinar som vi har fylt med ting vi førebels ikkje har bestemt oss for skjebna til enno. Eg ser nok for meg at vi kjem til å kvitta oss med mykje av dette også, til slutt, seier han.

Første natt i natt

I morgon blir dei nye møblane til Eide-Olsen levert, så kjem ny TV og nye kvitevarer.

– Men allereie i dag kjem flyttebilen, der vi blant anna har soveromsmøblane våre.

– Vi flyttar inn i dag, så natt til onsdag blir vår første natt i sjøfronten, fortel Per.

Medan han venta på flyttebilen gjekk han i dag og såg Paal Moberg og Kjell Solberg frå Interiøren Os Fargehandel montera solskjerming.

– Det er mange store vindauge i desse husværa, så det har blitt ein del oppdrag, fortel Moberg.

Pluss og minus med Os

Eide-Olsen fortel at dei frå før har både venar og familie som er busett i Os, og som bergensar kjenner nabobygda godt nok til å veta at dei kjem til å lika seg her.

– Kona har lenge likt butikkutvalet i Os godt, og ofte reist til Os for å handla blant anna klede.

– Om det er eit pluss eller eit minus at ho no får gangavstand til Os sentrum kan diskuterast, seier Per og humrar, naturlegvis i kona sitt fråvær.

Verksemd innan reiseliv?

Ekteparet Eide-Olsen pensjonerte seg ved årsskifte. Då hadde Per, som blir sett på som ein nestor i norsk reiseliv, vore direktør i 10 år for Hurtigruten. Tidlegare har han blant anna vore direktør for PLUS Reiser.

– Eg har pensjonert meg, men eg føler meg framleis ganske oppegåande. Så sjølv om eg no har ei fin utsikt kan det henda at eg ikkje berre vil sitja og drikka kaffi om dagane.

Han har oppretta eit selskap, men har førebels ingen konkrete planar.

– Kanskje eg involverer meg i reise- og konferanselivet i Os, vi får sjå, seier Per med eit lurt smil.

– Alt er ferdig - nesten

Osland fortel at det meste no er ferdig i og rundt husa som i desse dagar blir overtatt.

– Litt småting er det her og der, men det har gått veldig fint til no.

Bygginga held fram for fullt med J- og K-blokka, men utearealet mellom H- og I-blokka er nærmast klart.

Det er høg aktivitet utomhus med planting. I tillegg blir det jobba med det offentlege bryggearealet, blant anna med bygging av fin tilkomst frå bakkenivå ved moloen og ned til den nye brygga på utsida av anlegget.

– Kva med parkering til desse første 37 kjøparane?

– Ja, alt i ordren er klart, også parkeringsetasjane i kjellaren under blokkene, fortel Osland.

6 + 8 ledige

H-blokka er den nærmast Oseana. Her er 16 av 20 husvære selt. I-blokka har berre 2 ledige av i alt 23.

Les òg: God utsikt rundt hamna (72 av 86 er selt)

Også salet i neste trinn er nesten over, i J-blokka er det 7 ledige av 23, i K-blokka, den nærmast Os sentrum, er det berre éin ledig av 20. J- og K-blokkene har overtaking eit stykke ut i 2013.

Spennande? Vil du ha ukas høgdepunkt i innboksen?

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.