Første skuledag i Øyane
Sommarferien er no offisielt over for skuleborna i Os. Ekstra spennande var nok dagen for dei nye førsteklassingane.
På Søre Øyane skule torsdag var flagget heist og gymsalen fylt med born og foreldre då skulen starta igjen etter ferien.
Og vêret var som bestilt, med nydelig solskin.
Som ein av elevane sa:
- Pappa seier at i ferien då er det regn og litt sol, men når skulane startar og ferien er over, så kjem finvêret.
Frå eldst til yngst
- Det var ei nydeleg ramme rundt ein flott dag, meinte rektor Elin Skaatun om første skuledag.
Rektor ønskte dei rundt 100 elevane velkomen til skulestart og meinte å sjå mange som hadde vakse gjennom ferien.
For 12 gutar og 8 jenter var dagen ekstra stor.
Dei kom til sin første skuledag i 1. klasse, og gjekk frå å vera eldst i barnehagen til yngst på skulen.
Kontaktlæraren deira, Grethe Karin Hatvik, får ein liten overgong når ho går frå å ha 13 elevar i 7. klasse til 20 i 1. klasse.
Då var det godt ho hadde med ein hjelpar, nemlig klassemaskoten Max.
Flest av dei yngste
Det er ikkje berre i Øyane at det er spente 1. klassingar.
Informasjon frå kommunen viser at det er heile 286 born i Os som startar sin aller fyrste skuledag.
Det er 17 fleire enn i fjor, og 1. klasse vil i år, samla sett, vera det største kullet på grunnskulen i Os.
På 2. plass kjem 2. klassingane, som til saman tel 270. Det minste kullet er 5. klassingane, som tel 229 elevar.