Første spadetak i går

Bildeserie:

1 av 6

I juli signerte Vestafjell avtalen om utviding av fylkesveg 158 frå Grindavoll til Vågshaugen, botnen av Storumbakken.

For 35 millionar skal 1,2 km veg utbetrast med breiare kjørefelt og gang- og sykkelveg.

Les òg: Lovde å sjå på vegen

Brakkene er på plass og tidlegare denne veka blei fartsgrensa redusert frå 50 til 30 km/t. I går starta gravinga.

– Vi startar ytst ved Storumbakken, for der er eit stykke som skal sprengast og steinen skal brukast andre stadar i prosjektet, blant anna nedst i Storumbakken, seier anleggsleiar Roger Bøe frå Vestafjell.

Sparer 3.500 turar med lastebil

Ved brakkeriggen er det ein tipp, og der skal det også dumpast jord og stein etter at prosjektet er ferdig.

– Vi har avtale med grunneigarar. Med lokal dumping av jord sparer vi lange turar med 35.000 kubikk med jord. Resultatet blir dessutan at grunneigarane får flatare og betre bakkar i driva nede i dalen her, seier Bøe og peikar.

Nokre lastebilturar til og frå området blir det likevel, 35.000 kubikk med stein må kjørast til området.

– Mykje trafikk

Arbeidet skal pågå til november 2016. I periodar kan trafikken bli stengt i inntil 15 minutt.

– Vi vil unngå å stenga mellom 7 og 9 om morgonen og etter 15 om ettermiddagen. Det er ganske mykje trafikk på vegen og ein del kø allereie, spesielt når tungtransport møte buss og det er midt i den travlaste tida.

– Har du inntrykk av at det er mange fotgjengarar på vegen, eller trur du mange no kjører ungane sine forbi den trafikkerte, smale vegen?

– Det er nokre fotgjengarar og ein del syklistar, men eg ser også at ein del står på busshaldeplassar, og at det kjører minibussar med skuleelevar forbi. Tryggleiken til desse er det viktigaste i vår anleggsperiode. Eg vil også oppmoda folk om å bruka refleks no når det har byrja å bli mørkt.

Vestafjell vil også setja opp ekstra vegbelysning i anleggsperioden.

Får nytt vatn tre gongar på eitt år

Fortauet skal gå på høgre side utover mot Øyane. Nokre stadar blir det fortau på begge sider av vegen.

Ein del av eigedomane må ofra noko areal og mange får ny innkjørsle. Eit stort tre ved Hagavik Hjemmebakeri, som dei ikkje fekk fella då det for 30 år sidan skulle leggast nye rør langs vegen, blir no ofra. Det blir også tre ulike uthus og garasjar.

– Det ligg både høgspent og vatn i bakken, så det blir ein del leidningar å flytta på, først til midlertidig plassering, så under nytt fortau.

Innbyggarane i Søre Øyane får varsling frå Os kommune/Bergen Vann når vatn, i kortare periodar på nattstid, blir stengt.

Ironisk nok blir Øyane kopla på ringleidning med vatn frå Halhjem neste år, etter at dei får midlertidig plassering og ny plassering i dagens prosjekt.