Forsvarte 10 år gamal NM-tittel

I 2005 vann Andrea Drange både jr-VM og NM i handbak på heimebane i Symrasalen. Året etter tok ho pause - i helga gjorde ho comeback og vann igjen!

Andrea Drange (t.h. og på toppen av pallen) i NM i 2005 i Symrasalen i Nore Neset Aktivitetshus og 2015 i turnhallen i Bergen (innfelt). (Foto: KVB og privat/Beathe Egholm)
Kjetil Vasby Bruarøy
Kjetil Vasby Bruarøymandag 19. okt. 2015 22:16

Bildeserie:

Andrea, Frode, Are, Anders Kolle, Rune Bårøy og Ronny Risøen.
1 av 1
Andrea, Frode, Are, Anders Kolle, Rune Bårøy og Ronny Risøen.

Andrea Drange var eit stortalent i ungdomen. I 2005 og 2006 vann ho junior-VM, i 2006 fekk ho bronse i EM i Budapest (mens Arne Thuen tok gull).

– Eg sleit med skader i handledda og tok ein pause. Så blei eg 18 og 19 år og det blei ikkje til at eg kom tilbake før no, seier Andrea.

I mellomtida har ho trent mykje, men ikkje handbak. Det var først då ho som nyutdanna personleg trenar møtte gamle handbakvenar på sin nye arbeidsplass, Sprek og Blid Os, at ho prøvde seg litt på handbakborda etter gamalt.

– Det er berre eit par veker sidan, men så kom Frode (Veim Haugland) og sa at han hadde meldt meg på.

Gull og sølv i comebacket

Andrea seier ho synest det var kjempegøy å koma tilbake til handbakmiljøet, og å møta gamle kjente igjen.

– Eg møtte ei tidlegare treningsvenninne frå Dale i finalen både i høgre og venstre arm.

Andrea vann gull med høgre og tok sølv med venstre.

Fire noregsmeistrar

Os Håndbakklubb tok fleire medaljar i NM.

Are Strønen fylte 40 i år og deltok i master, der han vann gull med venstre og sølv med høgre.

Erlend Hjertholm vann den tyngste (+80 kg) vektklassen i junior.

Frode Veim Haugland vann gull med både høgre og venstre arm i -95 kg.

– Det var eitt år eg var offshore, elles har eg vunne åtte år som senior, fortel Frode, som òg vann NM 3-4 gongar som junior.

To sølv til Tore Matre

Tore Matre er 94 kg og skulle stilla i same klasse, men gjekk opp i -105 kg.

– Eg har vore sjuk så eg tenkte det gjerne var litt færre motstandarar i den tyngste klassen. Men så kom tidlegare klubbkamerat Asle Kvamsdal, som no går for Masfjorden.

Tore møtte Asle i finalen med både høgre og venstre og tapte. Dermed blei det to NM-sølv.

Ikkje beste klubb

Årets NM gjekk i turnhallen i Bergen og arrangør Bergen Handbakklubb blei også beste klubb.

– Akkurat det var litt surt for oss som er vant med å vinna den tittelen. Men vi stilte med 15 deltakarar og Bergen 25, fortel Tore.

I 2014 var første år sidan 2004 at Os ikkje var beste klubb.

Arne Thuen, som vann NM seinast i 2013, deltok ikkje i oldboys, men i den tøffe klassen senior -85 kg.

– Etter ein skade i olbogen for halvanna år sidan så klarer eg ikkje å bruka same teknikk som før. Eg er kanskje for gamal til å øva inn ein ny, seier den 61 år gamle tidlegare verdsmeisteren.

I NM måtte han i år nøya seg med 5.plass.

Vann gull - etter eitt år

Anders Kolle, som tok sølv og bronse i fjor - kunne i år henta gull utan å delta.

Motstandaren frå i fjor blei nemleg tatt i doping, dermed blei Anders oppgradert til noregsmeister.

Midtsiden samleside: Handbak

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.