Frå 5 til 2x500
Jan Eggum og Halvdan Sivertsen tok to fullsette hus med storm i Oseana laurdag.
Dei to konsertane med duoen Jan Eggum og Halvdan Sivertsen har vore utseld i lang tid. Hadde dei villa kunne dei sikkert seld minst eit par framsyningar til.
Slik var det ikkje sist Sivertsen besøkte Os.
- Det var på Madam Ane. Då kom det fem og tre av dei maste om Bjøro Håland, fortalde Sivertsen.
Det er feil å kalla laurdagens to framsyninger for konsertar. Dei var så mykje meir. Rettare er det nok å kalla det for show.
Dei to etterkvart litt eldre herrane hadde glimt i augo og solide sleivspark både til kroppsfikserte kvinnfolk og Frp-arar med valet mellom himmel og helvete. Beundringsverdig var det å sjå korleis, spesielt Sivertsen, henta seg inn igjen då han var i ferd med å trø over streken.
Uoppfordra allsang
Dei to framsyningane var, ifølgje dei som såg begge, veldig forskjellige.
- Settlista var lik, men likevel var dei heilt forskjellege, fortel Janne Mari Hjelle.
På laurdagens siste konsert var i alle fall stemninga høg heile vegen. Toppa blei det heile då Eggum og Sivertsen kom inn igjen på scenen for ekstranumra "Kor e alle heltar hen" og "Kjærlighetsvisa". Då song Oseanasalen uoppfordra med på både på refereng og vers.
Kort oppsummert: Herrane Eggum og Sivertsen er hjarteleg velkomne tilbake. Om dei kjem åleine eller tar med seg dei to andre i Gitarkameratene som dei til hausten går på scenen saman med i Oslo speler inga rolle.
Vi tar sjansen på å lova deg at det kjem fleire enn fem også neste gong, Halvdan.